കുവൈത്ത് സിറ്റി: സൗത്ത് സഅദ് അല്‍ അബ്ദുല്ല റെസിഡന്‍ഷ്യല്‍ സിറ്റി പദ്ധതിയില്‍ 22,000 വീടുകള്‍ വിതരണത്തിന് സജ്ജമായി. 22,152 വീടുകള്‍ ജനുവരി 12 മുതല്‍ ഗുണഭോക്താക്കള്‍ക്ക് നല്‍കിത്തുടങ്ങുമെന്ന് ഭവനകാര്യ മന്ത്രി ഷായ അബ്ദുറഹ്മാന്‍ അല്‍ ഷായ പറഞ്ഞു. അനുബന്ധസൗകര്യങ്ങളുടെ നിര്‍മാണം പുരോഗമിക്കുകയാണ്.
കുവൈത്തികള്‍ക്കാണ് വീടുകള്‍ നല്‍കുന്നത്. ഭവനക്ഷേമ പബ്ലിക് അതോറിറ്റിയും കൊറിയ ലാന്‍ഡ് ആന്‍ഡ് ഹൗസിങ് കോര്‍പറേഷനും ചേര്‍ന്നാണ് പദ്ധതി നടപ്പാക്കുന്നത്. 6442 ഹെക്ടറില്‍ നടപ്പാക്കുന്ന പദ്ധതി കുവൈത്തിലെ ആദ്യ സ്മാര്‍ട്ട് റെസിഡന്‍ഷ്യല്‍ സിറ്റിയാണ്. പശ്ചിമേഷ്യയിലെതന്നെ ആദ്യ പരിസ്ഥിതിസൗഹൃദ, സ്മാര്‍ട്ട് റെസിഡന്‍ഷ്യല്‍ സിറ്റിയാണിതെന്ന് അധികൃതര്‍ അവകാശപ്പെടുന്നു.
താമസത്തിനുള്ള കെട്ടിടങ്ങള്‍, അഡ്മിനിസ്ട്രേറ്റിവ് ആന്‍ഡ് കമേഴ്സ്യല്‍ കെട്ടിടങ്ങള്‍, പള്ളികള്‍, സാംസ്കാരിക കേന്ദ്രങ്ങള്‍, നിക്ഷേപമേഖല, ആരോഗ്യമേഖല, പാര്‍ക്കുകള്‍, വിനോദസൗകര്യങ്ങള്‍, കൃത്രിമ തടാകം, സോളാര്‍ ഫാം എന്നിവ ഉള്‍ക്കൊള്ളുന്നതാണ് പദ്ധതി. 2017ലാണ് നിര്‍മാണം ആരംഭിച്ചത്.
നാല് ലക്ഷത്തിലേറെ ആളുകള്‍ക്ക് താമസിക്കാന്‍ കഴിയുന്ന 30,000ത്തിലേറെ ഹൗസിങ് യൂനിറ്റുകളാണ് സൗത്ത് സഅദ് അബ്ദുല്ല ഹൗസിങ് പ്രോജക്ടില്‍ ഉള്ളത്. ഒന്നാംഘട്ട ഏറ്റുവാങ്ങലിന് മുന്നോടിയായി 16 സര്‍ക്കാര്‍ ഏജന്‍സികള്‍ അടിസ്ഥാനസൗകര്യങ്ങള്‍ വിലയിരുത്തും.
