
ലണ്ടന്: പൊതുവഴിയില് സ്ത്രീകള്ക്ക് നേരെ ലൈംഗികാതിക്രമം നടത്തിയെന്ന കേസില് മലയാളിക്ക് മൂന്നു വര്ഷം തടവ് ശിക്ഷ. ബിനു പോളിനാണ് ശിക്ഷ ലഭിച്ചത്. 2019 മാര്ച്ച് 5 നാണു കേസിനാസ്പദമായ സംഭവം. കേറ്ററിംഗിലും റാഷ്ടനിലും ആണ് സംഭവം നടന്നത്. ആദ്യ സംഭവത്തില് സ്ത്രീയുമായി വാക്കേറ്റം ഉണ്ടായപ്പോള് പുറകില് നിന്നും എത്തി നിതംബത്തില് അടിച്ച ശേഷം പ്രതി കടന്നു കളയുക ആയിരുന്നു എന്നാണ് പരാതി. ഈ സംഭവത്തില് സിസിടിവി ദൃശ്യങ്ങളാണ് പരാതിക്കാരിയുടെ രക്ഷയ്ക്ക് എത്തിയത്. എന്നാല് സംഭവത്തിന് എന്താണ് പ്രകോപനമായതു എന്നത് വ്യക്തമല്ല. രണ്ടാമത്തെ സംഭവത്തില് സ്ത്രീയോടുള്ള മോശം പെരുമാറ്റത്തിന് നാട്ടുകാര് പിടികൂടി പോലീസില് ഏല്പ്പിക്കുക ആയിരുന്നു എന്ന് കോടതിയില് സമര്പ്പിച്ച കുറ്റപത്രത്തില് പറയുന്നു.
മദ്യപാനം മൂലമുള്ള പെരുമാറ്റ വൈകല്യം ആയിരുന്നു എന്ന് തെളിയിക്കാനുള്ള ബ്രീത് അനലൈസ് പരിശോധനയ്ക്ക് വിധേയനാകാതിരുന്നതും ബിനുവിനു തിരിച്ചടിയായി. ഇക്കാരണത്താല് 36 മാസത്തേക്ക് ഡ്രൈവിങ് നിരോധനവും ഏര്പ്പെടുത്തി. ലൈംഗിക അക്രമ പരാതി ഉന്നയിച്ച സ്ത്രീകളുടെ വാദം കണക്കിലെടുത്തു മൂന്നുവര്ഷത്തെ ജയില് ശിക്ഷയാണ് നോര്ത്താംപ്ടണ് ക്രൗണ് കോടതി വിധിച്ചത്. അഞ്ചുവര്ഷത്തേക്ക് ഒരു കാരണവശാലും കേസിനു തയാറായ ഇരകളെ ഒരു വിധത്തിലും ബന്ധപ്പെടരുത് എന്നും കോടതി നിര്ദേശിച്ചിട്ടുണ്ട് .ലൈംഗിക കുറ്റകൃത്യ രജിസ്റ്ററില് ആജീവനാന്ത കാലം ഇയാളുടെ പേര് ഉള്പ്പെടുത്തണം എന്നും കോടതി നിര്ദേശമുണ്ട് .