![](https://dd7kkoi8wt4b5.cloudfront.net/wp-content/uploads/2022/11/29164416/26.jpg)
കുവൈത്ത് സിറ്റി: ഇസ്ലാമിന്റെ ആരാധനാപരവും സാമൂഹികവും കർമശാസ്ത്രപരവുമായ വിഷയങ്ങളില് അവബോധം നല്കി ‘വെള്ളി വെളിച്ചം’ വെബ് ടോക്ക്.
റമദാനിലെ വെള്ളിയാഴ്ചകളില് കെ.ഐ.ജി കുവൈത്താണ് വെബ് ടോക്ക് സംഘടിപ്പിക്കുന്നത്. കെ.ഐ.ജി ഔദ്യോഗിക ഫേസ് ബുക്ക്, യൂട്യൂബ്, സോഷ്യല് മീഡിയ ഹാൻഡിലുകളിലൂടെ സംപ്രേഷണം ചെയ്യുന്ന തല്സമയ ചർച്ചക്ക് വലിയ സ്വീകാര്യത ലഭിച്ചതായി സംഘാടകർ അറിയിച്ചു.
പൊതുസമൂഹത്തിനു ഇസ്ലാമിന്റെ സാമൂഹികവും ആരാധനാപരവുമായ വിഷയങ്ങളില് അവഗാഹം നല്കുന്നതിനൊപ്പം തെറ്റിദ്ധാരണകള് ദൂരീകരിക്കുന്നതിനും വെബ് ടോക്ക് സഹായകമാകുന്നു. കെ.ഐ.ജി കുവൈത്ത് ഭാരവാഹികളായ ഫൈസല് മഞ്ചേരി, സക്കീർ ഹുസൈൻ തുവ്വൂർ എന്നിവരാണ് ചർച്ചക്ക് നേതൃത്വം നല്കുന്നത്. വിഡിയോ പോസ്റ്റ് ചെയ്തതിനുശേഷം ലഭിക്കുന്ന കമൻറുകള്ക്കും അന്വേഷണങ്ങള്ക്കും മറുപടി നല്കുന്നുണ്ട്. നിയാസ് ഇസ്ലാഹി അവതാരകനാണ്. സമീർ കോക്കൂർ,അൻവർ സഈദ്, ഡോ.അലിഫ് ശുക്കൂർ എന്നിവരും ചർച്ചയില് പങ്കെടുക്കുമെന്ന് ഭാരവാഹികള് അറിയിച്ചു. അംജദ് കോക്കൂർ, ജസീല് ചെങ്ങളാൻ എന്നിവരാണ് സാങ്കേതിക സംവിധാനം.