ലണ്ടന്‍: യുകെയിലേക്ക് പ്രവേശിക്കുന്ന അന്താരാഷ്ട്ര വിദ്യാര്‍ത്ഥികളെ വിമര്‍ശിച്ച റിപ്പോര്‍ട്ടിനെതിരെ രോഷം പ്രകടിപ്പിച്ച് ഇന്ത്യന്‍ വിദ്യാര്‍ത്ഥി സംഘടനകള്‍. ഗ്രാജുവേറ്റ് റൂട്ട് പ്രതീക്ഷിച്ചത് പോലെ ആഗോള മികവിനെ ആകര്‍ഷിച്ചില്ലെന്നാണ് റിപ്പോര്‍ട്ട് കുറ്റപ്പെടുത്തുന്നത്. ഇതിന് പകരം കുറഞ്ഞ ഫീസുള്ള യൂണിവേഴ്സിറ്റികളില്‍ പഠിക്കാനെത്തുന്നവര്‍ കുറഞ്ഞ സ്‌കില്ലും, കുറഞ്ഞ വേതനമുള്ള ജോലികളിലും എത്തിപ്പെടാനാണ് ഇത് സഹായിച്ചതെന്നാണ് കുറ്റപ്പെടുത്തല്‍. യുകെയിലെ അന്താരാഷ്ട്ര വിദ്യാര്‍ത്ഥികളുടെ ഏറ്റവും വലിയ വിഭാഗമാണ് ഇന്ത്യക്കാര്‍. 2022-ല്‍ 139,700 വിദ്യാര്‍ത്ഥി വിസകളാണ് ഇന്ത്യന്‍ പൗരന്‍മാര്‍ക്ക് ലഭിച്ചത്. ആകെ അന്താരാഷ്ട്ര വിദ്യാര്‍ത്ഥികളുടെ 30 ശതമാനമാണിത്. ഇവരില്‍ ഭൂരിഭാഗവും ഗ്രാജുവേറ്റ് റൂട്ടിലാണ് യുകെയില്‍ പ്രവേശിച്ചത്. ഇതുവഴി പഠനത്തിന് ശേഷം യുകെയില്‍ ജോലി ചെയ്യാനും സാധിക്കും.
എന്നാല്‍ 2023-ലെ മൈഗ്രേഷന്‍ അഡൈ്വസറി കമ്മിറ്റി റിപ്പോര്‍ട്ട് ഗ്രാജുവേറ്റ് റൂട്ടിനെ വിമര്‍ശിക്കുകയാണ് ചെയ്തത്. പ്രഖ്യാപിക്കുമ്പോള്‍ ഉദ്ദേശിച്ച ഫലമല്ല ഇത് നല്‍കുന്നതെന്നാണ് എംഎസിയുടെ നിലപാട്. യുകെയില്‍ ജോലി ചെയ്യാനായി അന്താരാഷ്ട്ര വിദ്യാര്‍ത്ഥികള്‍ ഉപയോഗിക്കുന്ന പിന്‍വാതിലാണ് ഈ റൂട്ടെന്നാണ് റിപ്പോര്‍ട്ട് കുറ്റപ്പെടുത്തുന്നത്. ‘അന്താരാഷ്ട്ര ഗ്രാജുവേറ്റ് റൂട്ട് യുകെ സമ്പദ് വ്യവസ്ഥയ്ക്ക് സംഭാവന നല്‍കുന്നുണ്ട്. എന്നാല്‍ ഇത് ആഗോള മികവിനെ ആകര്‍ഷിക്കുന്നതിലേക്ക് സഹായിക്കുന്നില്ല. നല്ലൊരു ശതമാനം വിദ്യാര്‍ത്ഥികളും കുറഞ്ഞ വേതനത്തിലുള്ള റോളുകളിലാണ് പ്രവേശിക്കുന്നത്’, റിപ്പോര്‍ട്ട് പറഞ്ഞു.
