കുവൈത്ത് സിറ്റി: ഗുരുതര രോഗങ്ങളുടെ ചികിത്സക്ക് ഇനി അത്യാധുനിക റോബോട്ടിക് സര്‍ജറി സഹായം. ശൈഖ് സബാഹ് അഹ്മദ് യൂറോളജി സെന്ററില്‍ ശസ്ത്രക്രിയക്ക് അത്യാധുനിക റോബോട്ടുകള്‍ സജ്ജീകരിച്ചു.
കഴിഞ്ഞ ദിവസം കാൻസര്‍ ബാധിച്ച രോഗിയുടെ പ്രോസ്റ്റേറ്റ് ഗ്രന്ഥി നീക്കുന്നതിന് റോബോട്ടിന്റെ സഹായത്തോടെ വിജയകരമായി ശസ്ത്രക്രിയ നടത്തി. ഡാവിഞ്ചി സി എന്ന സര്‍ജിക്കല്‍ റോബോട്ടിന്റെ സഹായത്തോടെയാണ് സര്‍ജറി പൂര്‍ത്തിയാക്കിയത്. യൂറോളജി വിഭാഗം മേധാവിയും റോബോട്ടിക് സര്‍ജനുമായ അലി അബ്ദുല്‍ വഹാബാണ് ശസ്ത്രക്രിയക്ക് നേതൃത്വം നല്‍കിയത്.
സര്‍ജിക്കല്‍ റോബോട്ടുകളുടെ സഹായത്തോടെ വേദന കുറച്ച്‌, കൂടുതല്‍ കൃത്യതയോടെ ശസ്ത്രക്രിയ പൂര്‍ത്തിയാക്കാൻ കഴിയും. റോബോട്ട് പിന്തുണയോടെ ശസ്ത്രക്രിയകള്‍ നടത്തുമ്ബോള്‍ കുറഞ്ഞ അളവിലെ രക്തനഷ്ടമേ ഉണ്ടാകൂ എന്നും അദ്ദേഹം പറഞ്ഞു. ഡാവിഞ്ചി സര്‍ജിക്കല്‍ സിസ്റ്റം ഉപയോഗിക്കുന്നതിലൂടെ അണുബാധക്കുള്ള സാധ്യത കുറക്കാം. ആശുപത്രി വാസവും കുറഞ്ഞ കാലത്തേക്കു മതിയെന്നും ഡോ. അലി അബ്ദുല്‍ വഹാബ് പറഞ്ഞു. വൃക്കരോഗവുമായി ബന്ധപ്പെട്ട നിരവധി പ്രശ്നമുള്ള മറ്റൊരു രോഗിക്കും സര്‍ജറി നടത്തിയതായി ആശുപത്രി അധികൃതര്‍ അറിയിച്ചു. നേരത്തേ ജാബിര്‍ ആശുപത്രിയില്‍ ഉദരസംബന്ധമായ പ്രശ്നങ്ങളുള്ള രോഗികള്‍ക്ക് റോബോട്ടുകളുടെ സഹായത്തോടെ ശസ്ത്രക്രിയ നടത്തിയിരുന്നു.
