കുവൈത്ത് സിറ്റി: റമദാനില്‍ ജോർഡനിലെ മാനുഷിക പ്രവർത്തനങ്ങള്‍ വർധിപ്പിച്ച്‌ കുവൈത്തിലെ ചാരിറ്റി സംഘടനകള്‍. ജോർഡനിലെ സിറിയൻ,ഫലസ്തീൻ അഭയാർഥികള്‍ക്കും മറ്റുള്ളവർക്കും സംഘടനകള്‍ സഹായം ലഭ്യമാക്കുന്നുണ്ട്.
കുവൈത്ത് റെഡ് ക്രസന്റ് സൊസൈറ്റി (കെ.ആർ.സി.എസ്), ജോർഡൻ പ്രതിനിധിയുമായി സഹകരിച്ച്‌ അല്‍ അഖബയിലെ 600 ഓളം അനാഥർക്കായി ഇഫ്താർ സംഘടിപ്പിച്ചു. റമദാനില്‍ കെ.ആർ.സി.എസ് ഏകദേശം 15,000 നോമ്ബുതുറ വിഭവങ്ങളും വിതരണം ചെയ്തു. ഇവ തുടരുമെന്നും കെ.ആർ.സി.എസ് വ്യക്തമാക്കി.റഹ്മ സൊസൈറ്റി 12,000 സിറിയൻ, ഫലസ്തീൻ അഭയാർഥികള്‍ക്ക് ഏകദേശം 2,500 ഭക്ഷണക്കിറ്റുകള്‍ വിതരണം ചെയ്തു.
ഇന്റർനാഷനല്‍ ഇസ്‌ലാമിക് ചാരിറ്റി ഓർഗനൈസേഷൻ അല്‍ ഘറ പ്രാദേശിക ചാരിറ്റിയുമായി ചേർന്ന് 700 ഭക്ഷണക്കിറ്റുകളും വിതരണം ചെയ്യുന്ന പദ്ധതി തയാറാക്കിയിട്ടുണ്ട്. ജോർഡനിലെ അഭയാർഥികള്‍ക്ക് പിന്തുണ നല്‍കുകയും ജീവിതസാഹചര്യങ്ങള്‍ മെച്ചപ്പെടുത്താനുമായാണ് സഹായം എത്തിക്കുന്നത്. അനാഥരായ സിറിയൻ അഭയാർഥികളിലെ 143 ഖുർആൻ മനപ്പാഠമാക്കിയവരെ ആദരിക്കുന്ന ചടങ്ങും നാമ ചാരിറ്റി സൊസൈറ്റി സംഘടിപ്പിച്ചു. ജോർഡനിലെ കുവൈത്ത് അംബാസഡർ ഹമദ് അല്‍മാരി നേതൃത്വം നല്‍കി.
