ഒമാനില്‍ വിവിധ പ്രദേശങ്ങളില്‍ കഴിഞ്ഞദിവസം മഴ പെയ്തു. സാമാന്യം ഭേദപ്പെട്ട മഴയാണ് വിവിധ ഇടങ്ങളില്‍ ലഭിച്ചത്. വാദികള്‍ നിറഞ്ഞൊഴുകുകയും റോഡുകളില്‍ ഗതാഗത തടസ്സവും നേരിട്ടു. ചില വാദികളില്‍നിന്ന് സാഹസികമായാണ് പലരേയും രക്ഷിച്ചത്.
അതേസമയം, അനിഷ്ടസംഭവങ്ങളൊന്നും റിപ്പോര്‍ട്ട് ചെയ്തിട്ടില്ല. മഴക്ക് അകമ്ബടിയായി ചില ഇടങ്ങളില്‍ നല്ല കാറ്റും ഉണ്ടായിരുന്നു. റുസ്താഖ്, ഇബ്രി, അവാബി വിലായത്തുകളിലും ജബല്‍ ഹജര്‍ നിരകളിലും സമീപ പ്രദേശങ്ങളിലുമാണ് കനത്ത മഴ പെയ്തത്. മറ്റിടങ്ങളില്‍ നേരിയ മഴയാണ് കിട്ടിയത്. മഴ ലഭിച്ച സ്ഥലങ്ങളിലെല്ലാം രാവിലെ മുതല്‍ക്കുതന്നെ മൂടിക്കെട്ടിയ അന്തരീക്ഷമാണുണ്ടായിരുന്നത്.
