മസ്കത്ത്: ലോകത്തിന്‍റെ വിവിധ ഭാഗങ്ങളില്‍നിന്നുള്ള സഞ്ചാരികളുമായി ഈ സീസണിലെ മൂന്നാമത്തെ ആഡംബരക്കപ്പല്‍ ഐഡ കോസ്മ സലാല തുറമുഖത്തെത്തി. ഈജിപ്തില്‍നിന്ന് വരുന്ന ഇറ്റാലിയന്‍ കപ്പലില്‍ 4507 വിനോദസഞ്ചാരികളാണുള്ളത്.
സഞ്ചാരികള്‍ സലാലയിലെ ബീച്ചുകള്‍, പരമ്ബരാഗത മാര്‍ക്കറ്റുകള്‍, പുരാവസ്തു, വിനോദസഞ്ചാര, ചരിത്രസ്മാരകങ്ങള്‍ പര്യടനം നടത്തും. ഇതിനുശേഷം കപ്പല്‍ ഖാബൂസ് തുറമുഖത്തേക്ക് തിരിക്കുകയും ചെയ്യും. ലോകത്തിലെ തന്നെ ഏറ്റവും വലിയ ആഡംബരക്കപ്പലുകളിലൊന്നാണ് ഐഡ കോസ്മ.
സുല്‍ത്താനേറ്റില്‍ ആദ്യമായിട്ടാണ് ഈ കപ്പല്‍ എത്തുന്നത്. നവംബര്‍ എട്ടിന് 881 വിനോദസഞ്ചാരികള്‍ ഉള്‍പ്പെടെ 1332 യാത്രക്കാരുമായി വൈക്കിങ് മാര്‍സലും ഒക്ടോബര്‍ 21ന് 1651 ആളുകളുമായി ‘ക്വീന്‍ എലിസബത്ത്’ സലാലയില്‍ എത്തിയിരുന്നു. ഈ ശൈത്യകാല സീസണില്‍ 30ലധികം ക്രൂസുകള്‍ സലാലയില്‍ എത്തിച്ചേരുമെന്ന് അധികൃതര്‍ അറിയിച്ചിട്ടുണ്ട്. ആഗോളതലത്തില്‍ സഞ്ചാരികളുടെ ഇഷ്ടകേന്ദ്രങ്ങളിലൊന്നാണ് ദോഫാര്‍. അതിനാല്‍ ക്രൂസ് ടൂറിസം മെച്ചപ്പെടുത്തുന്നതിനായി പൈതൃക വിനോദസഞ്ചാര മന്ത്രാലയം സര്‍ക്കാര്‍, സ്വകാര്യ മേഖലാ സ്ഥാപനങ്ങളുമായും ക്രൂസ് ഓപറേറ്റര്‍മാരുമായും സഹകരിച്ച്‌ പ്രവര്‍ത്തിക്കുന്നുണ്ട്. വിവിധ അതോറിറ്റികളുമായും ടൂറിസം കമ്ബനികളുമായും ഷിപ്പിങ് ഏജന്റുമാരുമായും സഹകരിച്ച്‌ മന്ത്രാലയം നടത്തുന്ന പ്രമോഷന്‍റെ ഭാഗമായി ക്രൂസ് മേഖലയില്‍ വളര്‍ച്ചയും ഉണര്‍വുമുണ്ടാകുമെന്നാണ് കരുതുന്നത്.
രാജ്യത്തെ ഈ സീസണിലെ ക്രൂസ് സീസണിന് തുടക്കംകുറിച്ച്‌ ദിവസങ്ങള്‍ക്ക് മുമ്ബ് കപ്പല്‍ തീരം തൊട്ടിരുന്നു. 2230 ആളുകളുമായി ജര്‍മന്‍ ക്രൂസ് കപ്പല്‍ മെയ്ന്‍ ഷിഫ്-6 ആണ് സുല്‍ത്താന്‍ ഖാബൂസ് തുറമുഖം, ഖസബ് തുറമുഖം എന്നിവിടങ്ങളില്‍ എത്തിയത്.
