ഒമാന്‍ സന്ദര്‍ശിക്കുന്നവരുടെ എണ്ണത്തില്‍ കഴിഞ്ഞ വര്‍ഷം ഗണ്യമായ വര്‍ധനവ്.2022ല്‍ 29 ലക്ഷം ആളുകള്‍ ഒമാന്‍ സന്ദര്‍ശിച്ചു. മുന്‍വര്‍ഷവുമായി താരതമ്യം ചെയ്യുമ്ബോള്‍ 348 ശതമാനത്തിന്‍റെ വര്‍ധനയാണുണ്ടായത്. ദേശീയ സ്ഥിതി വിവരകേന്ദ്രത്തിന്‍റെ കണക്കുകളിലാണ് ഇക്കാര്യങ്ങള്‍ സൂചിപ്പിക്കുന്നത്.
ഏറ്റവും കൂടുതലാളുകളെത്തിയത് യു.എ.ഇയില്‍നിന്നാണ്. 19 ലക്ഷം ആളുകളാണ് യു.എ.ഇയില്‍നിന്ന് ഇവിടെയെത്തിയത്. 3,55,460 സന്ദര്‍ശകരുമായി ഇന്ത്യയാണ് രണ്ടാം സ്ഥാനത്ത്. യമന്‍ -1,06,529, ജര്‍മനി -41,829 എന്നീ രാജ്യങ്ങളാണ് തൊട്ടുപിന്നില്‍. രാജ്യത്തെ സ്റ്റാര്‍ ഹോട്ടലുകളുടെ (3-5) വരുമാനം കഴിഞ്ഞവര്‍ഷം ഡിസംബര്‍ അവസാനത്തോടെ 82.7 ശതമാനം വര്‍ധിച്ച്‌ 1,85,772 റിയാലായി. ഹോട്ടലുകളിലെ അതിഥികളുടെ എണ്ണം 2021ലെ ഇതേ കാലയളവിനെ അപേക്ഷിച്ച്‌ 33.6 ശതമാനത്തിന്‍റെ വര്‍ധനയാണുണ്ടായത്. താമസ നിരക്ക് 17.6 ശതമാനം ഉയര്‍ന്ന് 45 ശതമാനത്തിലുമെത്തി.
