അനധികൃത കുടിയേറ്റത്തിന് എതിരായ നടപടികളുടെ ഭാഗമായി നടത്തിയ പരിശോധനകളിലാണ് 60-ഓളം മോപ്പഡ് ഡ്രൈവര്‍മാര്‍ അനധികൃതമായി ജോലി ചെയ്ത് പിടിയിലായത്. ഇവരില്‍ നിരവധി ഇന്ത്യക്കാരുണ്ടെന്ന് യുകെ സര്‍ക്കാര്‍ വ്യക്തമാക്കി.
ഇന്ത്യക്കാര്‍ക്ക് പുറമെ ബ്രസീല്‍, അള്‍ജീരിയ സ്വദേശികളും അറസ്റ്റിലായിട്ടുണ്ട്. അനധികൃതമായി ജോലി ചെയ്തതിനും, വ്യാജ രേഖകള്‍ കൈവശം വെച്ചതിനും ഉള്‍പ്പെടെയുള്ള കുറ്റങ്ങളാണ് ഇവര്‍ക്കെതിരെ ചുമത്തുന്നത്. ചെറുബോട്ടുകളില്‍ കയറി ഇംഗ്ലീഷ് ചാനല്‍ അനധികൃതമായി കടക്കുന്ന ഏറ്റവും വലിയ രണ്ടാമത്തെ കുടിയേറ്റ വിഭാഗം ഇന്ത്യക്കാരുടേതാണെന്ന് യുകെ ഹോം ഓഫീസ് കണക്കുകള്‍ വ്യക്തമാക്കിയിരുന്നു.
‘അനധികൃത ജോലി നമ്മുടെ സമൂഹത്തെ തകര്‍ക്കും, സത്യസന്ധരായ ജോലിക്കാരെ വഞ്ചിതരാക്കി പുറത്താക്കും, പൊതുപഴ്സ് കൊള്ളയടിക്കും’, യുകെ ഹോം സെക്രട്ടറി സുവെല്ലാ ബ്രാവര്‍മാന്‍ വ്യക്തമാക്കി. നമ്മുടെ നിയമങ്ങളും അതിര്‍ത്തികളും ചൂഷണം ചെയ്യുന്നത് തടയാന്‍ വേഗത്തിലുള്ള നടപടികളാണ് പ്രധാനമന്ത്രി റിഷി സുനാക് മുന്നോട്ട് വെച്ചിരിക്കുന്നത്. ലേബര്‍ വിപണി മാന്യവും, സത്യസന്ധവുമാകണം. പൊതുജനം വാങ്ങുന്ന ഉത്പന്നങ്ങളും, സേവനങ്ങളും നിയമപരമായതാണെന്ന ആത്മവിശ്വാസവും ആവശ്യമാണ്, ഇന്ത്യന്‍ വംശജയായ ഹോം സെക്രട്ടറി വിശദമാക്കി.
അറസ്റ്റിലായ 60 പേരില്‍ 44 പേരെ ഹോം ഓഫീസ് കസ്റ്റഡിയിലെടുത്തു. ഇവരെ യുകെയില്‍ നിന്നും നാടുകടത്താനുള്ള നടപടികളിലേക്ക് നീങ്ങും. 16 പേരെ ഇമിഗ്രേഷന്‍ ജാമ്യത്തില്‍ വിട്ടയച്ചു. ഇത്തരം അറസ്റ്റുകള്‍ വരുമ്പോള്‍ യുകെയില്‍ നിന്നും നിരവധി പേര്‍ തനിയെ ഒഴിഞ്ഞുപോകുമെന്ന് ഗവണ്‍മെന്റ് പ്രതീക്ഷിക്കുന്നു. ഡെലിവെറൂ, ജസ്റ്റ്ഈറ്റ്, ഉബര്‍ഈറ്റ്സ് തുടങ്ങിയ കമ്പനികള്‍ക്കായി കരാറില്ലാതെ ജോലി ചെയ്യാനാണ് അനധികൃത ജോലിക്കാരെ ഉപയോഗിക്കുന്നത്.
