കുവൈത്ത് സിറ്റി: 10 ടണ് ദുരിതാശ്വാസ സഹായവുമായി സുഡാനിലേക്ക് കുവൈത്ത് ഏഴാമത്തെ വിമാനം അയച്ചു. കുവൈത്തില്നിന്നുള്ള സഹായം സുഡാനിലെ ജനങ്ങളുടെ കഷ്ടപ്പാടുകള് കുറക്കുമെന്ന് കുവൈത്ത് റെഡ് ക്രസന്റ് സൊസൈറ്റി പബ്ലിക് റിലേഷന്സ് ആന്ഡ് മീഡിയ മേധാവി ഖാലിദ് അല് സെയ്ദ് പറഞ്ഞു.
കുവൈത്തിനും സുഡാനുമിടയില് ആവശ്യമായ സാമഗ്രികളുടെ വരവ് ഉറപ്പാക്കാന് ദുരിതാശ്വാസ കാമ്ബയിന് എയര് ബ്രിഡ്ജ് നിലനിര്ത്തുമെന്ന് അദ്ദേഹം വ്യക്തമാക്കി.
ആഭ്യന്തരസംഘര്ഷം മൂലം ദുരിതം അനുഭവിക്കുന്ന സുഡാന് ജനതക്ക് സഹായം എത്തിക്കാന് കുവൈത്തിന്റെ രാഷ്ട്രീയ നേതൃത്വം നിര്ദേശം നല്കിയിരുന്നു. സുഡാനിലേക്ക് ഭക്ഷണവും മെഡിക്കല് സാമഗ്രികളും എത്തിക്കാന് കുവൈത്ത് മന്ത്രിസഭയും തീരുമാനം എടുത്തു. ഇതിനുപിറകെയാണ് സഹായവുമായി കുവൈത്തില് നിന്ന് ദുരിതാശ്വാസ സഹായവുമായി വിമാനങ്ങള് പുറപ്പെട്ടത്. സുഡാനില് ആഭ്യന്തര കലഹം പൊട്ടിപ്പുറപ്പെട്ടതിനുശേഷം 70 ടണ് ഭക്ഷണവും വൈദ്യസഹായവും കുവൈത്ത് അയച്ചിട്ടുണ്ട്.