മസ്‌കറ്റ്: ഒമാനില്‍ മഴവെള്ളപ്പാച്ചിലുണ്ടാകുന്ന സമയങ്ങളില്‍ വാഹനവുമായി മനപ്പൂര്‍വം വാദികള്‍ മുറിച്ചുകടക്കുന്നവര്‍ക്ക് ഇതിനിടയില്‍ എന്തെങ്കിലും അപകടം സംഭവിച്ചാല്‍ നഷ്ടപരിഹാരം ലഭിക്കില്ലെന്ന മുന്നറിയിപ്പുമായി രംഗത്തെത്തിയിരിക്കുകയാണ് കാപ്പിറ്റല്‍ മാര്‍ക്കറ്റ് അതോറിറ്റി (സിഎംഎ) അധികൃതര്‍.
ഒമാനില്‍ തേജ് ചുഴലിക്കാറ്റ് വീശിയടിച്ചതിനെ തുടര്‍ന്ന് 50 മില്ലിമീറ്ററിനും 300 മില്ലിമീറ്ററിനും ഇടയില്‍ മഴ പെയ്യുമെന്ന് കാലാവസ്ഥാ നിരീക്ഷകര്‍ പ്രവചിച്ചിരുന്നു. ഇത് മലഞ്ചെരിവുകളിലും റോഡുകളിലും വലിയ രീതിയിലുള്ള നീരൊഴുക്കിന് കാരണമാവുമെന്നതിനാലാണ് ജാഗ്രത പാലിക്കാന്‍ അധികൃതര്‍ നിര്‍ദ്ദേശം നല്‍കിയിരിക്കുന്നത്. ജീവനും സ്വത്തുക്കള്‍ക്കും സംരക്ഷണം നല്‍കുന്നതിനുള്ള സുരക്ഷാ നിര്‍ദ്ദേശങ്ങള്‍ പാലിക്കുകയെന്നത് പ്രധാനമാണെന്ന് അതോറിറ്റി വ്യക്തമാക്കി. ഇതിനായി സിവില്‍ ഏവിയേഷന്‍ അതോറിറ്റിയുടെ കാലാവസ്ഥാ മുന്നറിയിപ്പുകളും റോയല്‍ ഒമാന്‍ പോലീസ് (ആര്‍ഒപി) മുന്നോട്ട് വച്ച മാര്‍ഗ്ഗനിര്‍ദ്ദേശങ്ങളും പാലിക്കണമെന്നും അധികൃതര്‍ അറിയിച്ചു.
