മസ്കത്ത്: റുവി കെ.എം.സി.സി ഫലസ്തീനിലേക്കുള്ള ജീവകാരുണ്യ പ്രവര്ത്തനങ്ങള്ക്ക് ദാറുല് അത്തയുമായി കൈകോര്ക്കും.
ഡിസംബര് രണ്ടിന് ‘ഓപണ് ഡേ ഫോര് ഫലസ്തീൻ’ എന്ന പേരില് മസ്കത്ത് ഇന്റര്നാഷനല് എയര്പോര്ട്ടിന് സമീപമുള്ള ഒമാൻ ഓട്ടോമൊബൈല് ഹബില് നടക്കുന്ന പൊതുപരിപാടിയില് റുവി കെ.എം.സി.സിയുടെ ചാരിറ്റി ഹെല്പ് ഡെസ്ക് ഉണ്ടായിരിക്കുമെന്ന് ഭാരവാഹികള് അറിയിച്ചു.
യുദ്ധക്കെടുതി അനുഭവിക്കുന്ന ഫലസ്തീൻ ജനതക്കു വേണ്ടിയുള്ള ജീവകാരുണ്യ പ്രവര്ത്തനങ്ങള് ഏകോപിപ്പിക്കുന്ന ഒമാനിലെ ഏറ്റവും വലിയ ചാരിറ്റി ഓര്ഗനൈസേഷനാണ് ദാറുല് അത്ത. കൂടിക്കാഴ്ചയില് ദാറുല് അത്ത ജനറല് മാനേജര് ഡോ. ഷംസ അല് ഹാരിസി, മാര്ക്കറ്റിങ് ആൻഡ് ചാരിറ്റി ഇവന്റ് കോഓഡിനേറ്റര് ഹനാൻ അല് മസ്കത്തി, റുവി കെ.എം.സി.സി പ്രസിഡന്റ് റഫീഖ് ശ്രീകണ്ഠപുരം, ജനറല് സെക്രട്ടറി അമീര് കവനൂര്, ട്രഷറര് മുഹമ്മദ് വാണിമേല് തുടങ്ങിയവര് പങ്കെടുത്തു.