യുക്രൈന് അഭയാര്ത്ഥികളെ സംരക്ഷിക്കാനുള്ള പുതിയ പദ്ധതിയുമായി ബ്രിട്ടന്. ‘ഹോംസ് ഫോര്’ യുക്രൈന് എന്ന പേരിലാണ് പുതിയ പദ്ധതി ആവഷ്കരിക്കുന്നത്.
ഇതു പ്രകാരം യുക്രൈന് പൗരന്മാര്ക്ക് മൂന്ന് വര്ഷം വരെ ബ്രിട്ടനില് തുടരാം. റഷ്യന് ആക്രമണം രൂക്ഷമായ സാഹചര്യത്തില് നിരവധിയാളുകളാണ് യുക്രൈനില് നിന്നും പലായനം ചെയ്തത്.
പതിനായിരത്തില്പരം ആളുകള്ക്ക് ബ്രിട്ടന് തൊഴില് വാഗ്ദാനം നല്കുന്നുണ്ട്. കൂടാതെ അഭയാര്ത്ഥികളുടെ ആരോഗ്യം സംരക്ഷിക്കുന്നതിനും വിദ്യാഭ്യാസത്തിനുമായി പ്രത്യേക പദ്ധതികളും ആവിഷ്കരിക്കുന്നുണ്ട്. കാബിനറ്റ് സെക്രട്ടറി മൈക്കല് ഗോവാണ് ഇക്കാര്യം വ്യക്തമാക്കിയത്. അഭയാര്ത്ഥികളുടെ സുരക്ഷ ഉറപ്പുവരുത്താന് ആവശ്യമായ നടപടികള് ഉടന് സ്വീകരിക്കണമെന്ന് അദ്ദേഹം പറഞ്ഞു.
ആതിഥേയര്ക്ക് പ്രതിമാസം 350 പൗണ്ട് ($457, 418 യൂറോ) നല്കാനും തീരുമാനമായി. ചുരുങ്ങിയത് ആറ് മാസത്തെ താമസത്തിന് യുക്രൈനികള് പ്രതിജ്ഞാബദ്ധരാകണമെന്ന നിബന്ധനയുമുണ്ട്. അതേസമയം യുക്രൈനില് നിന്നും വരുന്നവരുടെ സ്പോണ്സര്ഷിപ്പ് ബ്രിട്ടീഷ് പൗരന്മാര്ക്ക് ഏറ്റെടുക്കാം. ബ്രിട്ടീഷുകാര്ക്ക് സ്പോണ്സര്മാരായി രജിസ്റ്റര് ചെയ്യുന്നതിനുള്ള വെബ്സൈറ്റ് തിങ്കളാഴ്ച ആരംഭിക്കുമെന്നും ഒരാഴ്ചയ്ക്കുള്ളില് യുക്രൈനില് നിന്നുള്ള ആദ്യ സംഘത്തെ വരവേല്ക്കുമെന്നും കാബിനറ്റ് സെക്രട്ടറി വ്യക്തമാക്കി. പ്രതിപക്ഷമായ ലേബര് പാര്ട്ടി പുതിയ പദ്ധതിയെ സ്വാഗതം ചെയ്തു.