കുവൈറ്റ് സിറ്റി: കുവൈറ്റില്‍ വിദേശികള്‍ക്ക് കുടുംബ വിസ അനുവദിക്കുന്നതിനുള്ള കുറഞ്ഞ ശമ്ബള പരിധി 800 ദിനാറായി ഉയര്‍ത്തിയേക്കുമെന്ന് പ്രാദേശികമാധ്യമം റിപ്പോര്‍ട്ട് ചെയ്തു.
ഇത് സംബന്ധിച്ച്‌ ആഭ്യന്തര മന്ത്രാലയം ഉടന്‍ തീരുമാനം പ്രഖ്യാപിക്കുമെന്നും റിപ്പോര്‍ട്ടില്‍ പറയുന്നു. സ്വകാര്യ, സര്‍ക്കാര്‍ സ്ഥാപനങ്ങളിലെ ജീവനക്കാര്‍ക്ക് തീരുമാനം ഒരേപോലെ ബാധകമായിരിക്കും.
അടിസ്ഥാന ശമ്ബളം തെളിയിക്കുന്നതിനു അപേക്ഷകന്‍ തൊഴില്‍ അനുമതി രേഖയുടെ പകര്‍പ്പിനൊപ്പം ബാങ്ക്‌ അക്കൗണ്ട്‌ വിവരങ്ങളും സമര്‍പ്പിക്കേണ്ടി വരും. ഇത്തരമൊരു വ്യവസ്ഥ ഏര്‍പ്പെടുത്താനും മന്ത്രാലയം ആലോചിക്കുന്നുണ്ട്.
ജനസംഖ്യയിലെ അസന്തുലിതാവസ്ഥ പരിഹരിക്കുകയാണ് ഇതിലൂടെ ലക്ഷ്യമിടുന്നത്. ഉയര്‍ന്ന വരുമാനമുള്ള പ്രവാസികള്‍ക്ക് കുടുംബത്തെ കൊണ്ടുവരാനും, മികച്ച ജീവിതനിലവാരം ഉറപ്പുവരുത്താനും ഈ നീക്കത്തിലൂടെ ലക്ഷ്യമിടുന്നുവെന്നും റിപ്പോര്‍ട്ട് ചൂണ്ടിക്കാട്ടുന്നു.
500 ദിനാറാണ് നിലവില്‍ കുടുംബ വിസ ലഭിക്കുന്നതിനുള്ള കുറഞ്ഞ ശമ്ബള പരിധി. എന്നാല്‍ കഴിഞ്ഞ മാസം മുതല്‍ കുടുംബ സന്ദര്‍ശക വിസ, കുടുംബ വിസ എന്നിവ നല്‍കുന്നത് നിര്‍ത്തിവച്ചിരുന്നു.
