ലണ്ടണ്‍: എലിസബത്ത് രാജ്ഞിയുടെ സംസ്കാര ചടങ്ങുകള്‍ ലണ്ടനിലെ വെസ്റ്റ്മിന്‍സ്റ്റര്‍ ആബിയില്‍ . ചാള്‍സ് രാജാവും മറ്റ് മുതിര്‍ന്ന ബ്രിട്ടീഷ് രാജകുടുംബങ്ങളും എലിസബത്ത് രാജ്ഞിയുടെ മൃതദേഹത്തിനൊപ്പം അനുഗമിച്ചു.
ചാള്‍സ് രാജാവിന് പുറമെ രാജ്ഞി കാമില, രാജകുടുംബത്തിലെ മറ്റ് അംഗങ്ങള്‍, വില്യം രാജകുമാരന്റെയും കേറ്റിന്റെയും ഒന്‍പത് വയസുള്ള മകന്‍ ജോര്‍ജ്ജ് രാജകുമാരനും, ഏഴ് വയസ്സുള്ള മകള്‍ ഷാര്‍ലറ്റ് രാജകുമാരിയും സംസ്കാര ചടങ്ങില്‍ പങ്കെടുക്കും. പ്രിന്‍സ് ലൂയിസ് ചടങ്ങില്‍ ഭാഗമായേക്കില്ലെന്നാണ് റിപ്പോര്‍ട്ടുകള്‍.
എലിസബത്ത് രാജ്ഞിക്ക് വിടനല്‍കാന്‍ ലോകനേതാക്കളെല്ലാം വെസ്റ്റ്മിന്‍സ്റ്റര്‍ ആബിയില്‍ എത്തിയിട്ടുണ്ട്. ഇന്ത്യന്‍ രാഷ്ട്രപതി ദ്രൗപതി മുര്‍മു, അമേരിക്കന്‍ പ്രസിഡന്റ് ജൊ ബൈഡന്‍, ബ്രിട്ടിഷ് പ്രധാനമന്ത്രി ലിസ് ട്രസ്, മുന്‍ പ്രധാനമന്ത്രി ബോറിസ് ജോണ്‍സണ്‍, കാനേഡിയന്‍ പ്രധാനമന്ത്രി ജസ്റ്റിന്‍ ട്രൂ‍‍ഡൊ, ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ എന്നിവര്‍ മണിക്കൂറുകള്‍ക്ക് മുന്‍പ് തന്നെ എത്തിയതായാണ് വിവരം.
രാഷ്ട്രപതി ദ്രൗപതി മുര്‍മു ശനിയാഴ്ച എലിസബത്ത് രാജ്ഞിക്ക് ആദരാഞ്ജലി അര്‍പ്പിച്ചിരുന്നു. ചാള്‍സ് രാജാവുമായി രാഷ്ട്രപതി കൂടിക്കാഴ്ച നടത്തുകയും ചെയ്തു. പ്രദേശിക സമയം 11 മണിക്കാണ് ചടങ്ങുകള്‍ ആരംഭിച്ചത്. കഴിഞ്ഞ നാല് ദിവസമായി തുടര്‍ന്ന പൊതുദര്‍ശനത്തില്‍ ലക്ഷക്കണക്കിന് പേരാണ് രാജ്ഞിക്ക് ആദരാഞ്ജലികള്‍ അര്‍പ്പിക്കാനെത്തിയത്.
