മസ്കത്ത്: മാതാവില്‍നിന്ന് കുഞ്ഞിലേക്ക് എച്ച്‌.ഐ.വി, സിഫിലസ് എന്നിവ പകരുന്നത് നിര്‍മാര്‍ജനം ചെയ്തതിന് സുല്‍ത്താനേറ്റിന് അന്താരാഷ്ട്ര സര്‍ട്ടിഫിക്കറ്റ് ലഭിച്ചു. കഴിഞ്ഞ ദിവസം അല്‍ ബുസ്താന്‍ പാലസ് ഹോട്ടലില്‍ നടന്ന ചടങ്ങില്‍ ആരോഗ്യ മന്ത്രി ഡോ. ഹിലാല്‍ ബിന്‍ അലി അല്‍ സാബ്തി സര്‍ട്ടിഫിക്കറ്റ് ഏറ്റുവാങ്ങി. ലോകാരോഗ്യ സംഘടനയുടെ കിഴക്കന്‍ മെഡിറ്ററേനിയന്‍ മേഖലയുടെ റീജനല്‍ ഡയറക്ടര്‍ ഡോ. അഹമ്മദ് ബിന്‍ സലേം അല്‍-മന്ദരിയാണ് സര്‍ട്ടിഫിക്കറ്റ് കൈമാറിയത്.
കിഴക്കന്‍ മെഡിറ്ററേനിയന്‍ മേഖലയില്‍ ഈ ആഗോള സര്‍ട്ടിഫിക്കറ്റ് നേടുന്ന ആദ്യത്തേതും ലോക തലത്തില്‍ 16ാമത്തേയും രാജ്യമാണ് ഒമാന്‍.
ഈ നേട്ടം കൈവരിച്ച ഒമാനെ ലോകാരോഗ്യ സംഘടനയുടെ (ഡബ്ല്യു.എച്ച്‌.ഒ) ഡയറക്ടര്‍ ജനറല്‍ അഭിനന്ദിച്ചു. ഇത് അഭിമാന നിമിഷമാണെന്നും എല്ലാ ജീവനക്കാരുടെയും സഹകരണത്തോടെ മുന്നോട്ടുപോകുമെന്നും അല്‍ സാബ്തി പറഞ്ഞു. എച്ച്‌.ഐ.വി ബാധിതരായ സ്ത്രീകള്‍ക്കും അവരുടെ കുട്ടികള്‍ക്കും ഒരു വിവേചനവുമില്ലാതെ സേവനങ്ങള്‍ ലഭ്യമാക്കുന്നതിനുള്ള ഒമാന്റെ പ്രതിബദ്ധതയുടെ തെളിവാണ് ഈ സുപ്രധാന നേട്ടമെന്ന് അല്‍ മന്ദരി പറഞ്ഞു.
