സ്വര്‍ണ്ണാഭരണങ്ങള്‍ വില്‍പ്പന നടത്തുന്നതിന് പുതിയ നിയന്ത്രണങ്ങള്‍ ഏര്‍പ്പെടുത്തുവാന്‍ ഒരുങ്ങി കുവൈത്ത് വാണിജ്യ മന്ത്രാലയം. ജനുവരി ഒന്ന് മുതലാണ് രാജ്യത്ത് പുതിയ നിയമം നടപ്പിലാക്കുക. പുതിയ നയം നടപ്പിലാക്കുന്നതോടെ പഴയ ഹോള്‍ മാര്‍ക്കിംഗ് മുദ്രകള്‍ പതിച്ച സ്വര്‍ണ്ണാഭരണങ്ങള്‍ ജ്വല്ലറികളില്‍ വില്‍ക്കുവാനോ പ്രദര്‍ശിപ്പുക്കുവാനോ കഴിയില്ല.
അതിനിടെ സ്വര്‍ണ വ്യാപാരികള്‍ അടുത്ത മൂന്ന് ദിവസത്തിനകം പഴയ ഹോള്‍ മാര്‍ക്കിംഗ് മുദ്രയുള്ള സ്വര്‍ണ്ണാഭരണങ്ങള്‍ വാണിജ്യ മന്ത്രാലയത്തില്‍ നല്‍കി ഹോള്‍ മാര്‍ക്കിംഗ് സീല്‍ പതിപ്പിക്കണമെന്ന് അധികൃതര്‍ ആവശ്യപ്പെട്ടു. 2021 ല്‍ പുറപ്പെടുവിച്ച സര്‍ക്കാര്‍ തീരുമാനമാണ് നടപ്പിലാക്കുന്നതെന്ന് വാണിജ്യ മന്ത്രാലയം അണ്ടര്‍സെക്രട്ടറി മുഹമ്മദ് അല്‍ അന്‍സി വ്യക്തമാക്കി. തീരുമാനം നടപ്പിലാക്കുന്നതിനു നല്‍കിയ സമയ പരിധി ഈ മാസം 31 നു അവസാനിക്കുന്ന സാഹചര്യത്തിലാണ് നടപടിയെന്നും അദ്ദേഹം അറിയിച്ചു.
ഇതോടെ രാജ്യത്തെ നൂറുക്കണക്കിന് സ്വര്‍ണ വ്യാപാരികള്‍ ജനുവരി ഒന്നിന് മുമ്ബേ സ്വര്‍ണ്ണാഭരണങ്ങളില്‍ വാണിജ്യ മന്ത്രാലയത്തിന്‍റെ ഹോള്‍ മാര്‍ക്കിംഗ് സീല്‍ പതിപ്പിക്കേണ്ടിവരും. അതേസമയം ഉപഭോക്താക്കളുടെ കൈവശമുള്ള സ്വര്‍ണ്ണത്തിന് ഈ തീരുമാനം ബാധകമല്ലെന്ന് അധികൃതര്‍ അറിയിച്ചു. പുതിയ സീല്‍ പതിക്കാത്ത സ്വര്‍ണ്ണാഭരണങ്ങള്‍ക്ക് പണിക്കൂലി കണക്കാക്കില്ലെന്നും സ്വര്‍ണ്ണത്തിന്‍റെ മൂല്യം മാത്രമാണ് പരിഗണിക്കുകയെന്നും വാണിജ്യ മന്ത്രാലയം അറിയിച്ചു. അതിനിടെ പുതിയ നയം നടപ്പിലാക്കുന്നത് വിപണിയെ പ്രതികൂലമായി ബാധിക്കുമെന്ന് സ്വര്‍ണ വ്യാപരികള്‍ അഭിപ്രായപ്പെട്ടു.
