കുവൈത്ത് സിറ്റി: ഡ്യൂട്ടിക്കിടെ മയക്കുമരുന്ന് ഉപയോഗിച്ചതിന് പൊലീസ് ഉദ്യോഗസ്ഥന്‍ അറസ്റ്റിലായതായി പ്രാദേശിക പത്രം അല്‍ അന്‍ബ റിപ്പോര്‍ട്ട് ചെയ്തു. ഹവല്ലി ഗവര്‍ണറേറ്റിലെ പൊലീസ് ഉദ്യോഗസ്ഥനെയാണ് അറസ്റ്റ് ചെയ്തത്. ഇയാളുടെ കൈവശം മയക്കുമരുന്നുകളും മറ്റു ഉപകരണങ്ങളും ഉണ്ടായിരുന്നതായും റിപ്പോര്‍ട്ടില്‍ പറയുന്നു. ഇയാള്‍ക്ക് അടുത്തിടെ ക്ഷീണവും ലീവ് പതിവുമായതോടെ സ്റ്റേഷനിലെ ഉദ്യോഗസ്ഥര്‍ക്ക് സംശയം തോന്നിയിരുന്നു.
ഈ ആഴ്ച ജോലിസ്ഥലത്ത് എത്തിയ ഇയാള്‍ മയക്കുമരുന്ന് ദുരുപയോഗത്തിന്റെ ലക്ഷണങ്ങള്‍ പ്രകടിപ്പിച്ചതിനെത്തുടര്‍ന്ന് സഹപ്രവര്‍ത്തകര്‍ തടഞ്ഞുവെക്കുകയും പരിശോധനയില്‍ മയക്കുമരുന്ന് കണ്ടെടുക്കുകയുമായിരുന്നു. പിടികൂടിയ വസ്തുക്കള്‍ സഹിതം പ്രതിയെ ലഹരിവിരുദ്ധ വിഭാഗത്തിന് കൈമാറിയിട്ടുണ്ട്.
