കുവൈത്തില്‍ വിവിധ കുറ്റകൃത്യങ്ങളില്‍ അറസ്റ്റ് ചെയ്ത 20 പേരെ സുരക്ഷാ അധികാരികള്‍ക്ക് കൈമാറിയതായി ജനറല്‍ അഡ്മിനിസ്ട്രേഷന്‍ ഓഫ് റസിഡന്‍സ് അഫയേഴ്സ് ഇന്‍വെസ്റ്റിഗേഷന്‍ അറിയിച്ചു.
ഇതില്‍ അഞ്ചുപേര്‍ ഉദ്യോഗസ്ഥര്‍ക്ക് കൈക്കൂലി നല്‍കാന്‍ ശ്രമിച്ചതിനാണ് പിടിയിലായത്. താമസ, തൊഴില്‍നിയമം ലംഘിക്കല്‍, വ്യാജ സര്‍വിസ് ഓഫിസ് നടത്തല്‍, നിയമലംഘകര്‍ക്ക് അഭയം നല്‍കല്‍ എന്നിങ്ങനെ വിവിധ തരത്തിലുള്ള കുറ്റകൃത്യങ്ങളില്‍ ഏര്‍പ്പെട്ടവരാണ് മറ്റു പ്രതികള്‍.
ജഹ്‌റ ഇന്‍ഡസ്ട്രിയല്‍ ഏരിയയില്‍നിന്നാണ് നാല് നിയമലംഘകരെ പിടികൂടിയത്. കൈക്കൂലി ആരോപിച്ച്‌ അറസ്റ്റിലായവരില്‍ വിവിധ രാജ്യക്കാരുണ്ടെന്ന് ആഭ്യന്തര മന്ത്രാലയത്തിലെ പബ്ലിക് റിലേഷന്‍സ് ആന്‍ഡ് സെക്യൂരിറ്റി മീഡിയ ഡിപ്പാര്‍ട്മെന്റ് വ്യക്തമാക്കി. വ്യാജ സര്‍വിസ് ഓഫിസ് നടത്തിയതിന് രണ്ടുപേരും അറസ്റ്റിലായി.
