കുവൈത്ത് സിറ്റി: തുര്ക്കിയയിലും സിറിയയിലുമുണ്ടായ ഭൂകമ്ബത്തോടുള്ള കുവൈത്തിന്റെ മാനുഷികവും സമയോചിതവുമായ പ്രതികരണം പ്രശംസ അര്ഹിക്കുന്നതാണെന്ന് തുര്ക്കിയ അംബാസഡര് തുബ സോണ്മെസ്. ഭൂകമ്ബം ബാധിച്ച മേഖലകളിലേക്കുള്ള സഹായത്തിന് നന്ദിയുള്ളവരാണെന്നും അംബാസഡര് പറഞ്ഞു.
കുവൈത്ത് റെഡ് ക്രസന്റ് സൊസൈറ്റി (കെ.ആര്.സി.എസ്) മേധാവി ഡോ. ഹിലാല് അല് സയര്, മറ്റ് അംഗങ്ങള് എന്നിവരുമായി നടത്തിയ ചര്ച്ചയില് സംസാരിക്കുകയായിരുന്നു അവര്. കുവൈത്തിന്റെ സഹായം ഏറ്റവും ആവശ്യമുള്ളവരിലേക്ക് ഫലപ്രദമായി എത്തിച്ചേര്ന്നു. ഇത് തുര്ക്കിയ ഒരിക്കലും മറക്കില്ലെന്ന് അവര് അടിവരയിട്ടു. ഭൂകമ്ബം ഏറ്റവും കൂടുതല് ബാധിച്ച തുര്ക്കിയ, സിറിയന് മേഖലകളിലേക്ക് സഹായമെത്തുന്നത് ഉറപ്പാക്കാനുള്ള ശ്രമങ്ങള് കെ.ആര്.സി.എസ് തുടരുമെന്ന് ചാരിറ്റി മേധാവി പറഞ്ഞു.