കുവൈത്ത് സിറ്റി: കുവൈത്തില് പ്രവാസികള്ക്ക് ഡ്രൈവിംഗ് ലൈസന്സ് നല്കുന്നതിന് നിയന്ത്രണം ഏര്പ്പെടുത്താന് നീക്കം. ഡ്രൈവിംഗ് ലൈസന്സിന് അപേക്ഷിക്കുന്ന പ്രവാസികളുടെ മിനിമം വേതനം വര്ധിപ്പിക്കണമെന്നതാണ് പ്രധാന വ്യവസ്ഥ. ആഭ്യന്തര മന്ത്രാലയത്തിലെ ട്രാഫിക് വിഭാഗം പുതിയ ചട്ടങ്ങള് തയ്യാറാക്കിയെന്ന് പ്രാദേശിക മാധ്യമങ്ങള് റിപ്പോര്ട്ട് ചെയ്തു. രാജ്യത്തെ ഗതാഗതക്കുരുക്ക് പരിഹരിക്കുന്നതിന്റെ ഭാഗമായാണ് പുതിയ ചട്ടങ്ങള് ട്രാഫിക് വിഭാഗത്തിന്റെ നേതൃത്വത്തില് തയ്യാറാക്കിയത്.
സര്ക്കാര് രൂപീകരണത്തിന് ശേഷം പുതിയ നിര്ദ്ദേശങ്ങള് അനുമതിക്കായി ആഭ്യന്തര മന്ത്രിക്ക് സമര്പ്പിക്കുമെന്ന് പ്രാദേശിക മാധ്യമമായ കുവൈത്ത് ടൈംസ് റിപ്പോര്ട്ടു ചെയ്തു. ഡ്രൈവിംഗ് ലൈസന്സിന് അപേക്ഷിക്കുന്ന പ്രവാസികളുടെ മിനിമം വേതനം വര്ധിപ്പിക്കണമെന്നതാണ് പുതിയ വ്യവസ്ഥയില് പ്രധാനമായി പറയുന്നത്. ചില പ്രത്യേക തൊഴിലുകള്ക്ക് മാത്രമേ ഡ്രൈവിംഗ് ലൈസന്സ് ലഭിക്കൂ എന്നും ചട്ടത്തിലുണ്ടെന്ന് റിപ്പോര്ട്ടില് പറയുന്നു. ലൈസന്സ് മാനദണ്ഡങ്ങള് പാലിക്കാത്ത പ്രവാസികള്ക്കെതിരായ നടപടി രാജ്യത്ത് തുടരുകയാണ്.
കുവൈത്തില് രണ്ടു വര്ഷം ജോലി ചെയ്യുകയും കുറഞ്ഞത് 600 ദിനാര് ശമ്ബളവും ബിരുദവുമുള്ള പ്രവാസികള്ക്കാണ് രാജ്യത്ത് ഡ്രൈവിങ് ലൈസന്സിനു അപേക്ഷിക്കാന് അനുമതി. ലൈസന്സിന് അപേക്ഷിക്കുന്ന സമയത്തുള്ള യോഗ്യതകള് പിന്നീട് നഷ്ടപ്പെട്ടാല് ലൈസന്സുകള് സ്വമേധയാ റദ്ദാക്കപ്പെടും. ലൈസന്സ് റദ്ദാക്കിയിട്ടും വാഹനം ഓടിക്കുന്നതായി കണ്ടെത്തിയാല് ഇത്തരക്കാരെ രാജ്യത്ത് നിന്ന് നാടുകടത്തുന്നതടക്കമുള്ള നടപടികള് സ്വീകരിക്കുമെന്നും അധികൃതര് വ്യക്തമാക്കി. 15 വര്ഷത്തിലധികം പഴക്കമുള്ള വാഹനങ്ങളുടെ രജിസ്ട്രേഷന് പുതുക്കുന്നതുമായി ബന്ധപ്പെട്ട തീരുമാനവും ഉടന് ഉണ്ടാകുമെന്നാണ് സൂചനകള്.