മസ്കത്ത് : സര്ക്കാര് മേഖലയില് റംസാന് മാസത്തിലെ ‘ഫ്ലക്സിബിള്’ രീതി ജീവനക്കാര്ക്ക് ഗുണം ചെയ്യുക മാത്രമല്ല, റോഡുകളിലെ തിരക്ക് ഒഴിവാക്കാനും സഹായിക്കും.
‘ഫ്ലെക്സിബിള്’ സംവിധാനം അനുസരിച്ച് സര്ക്കാര് മേഖലയിലെ ഔദ്യോഗിക പ്രവര്ത്തന സമയം രാവിലെ 9 മുതല് ഉച്ചയ്ക്ക് 2 വരെയാണ്. യൂണിറ്റ് മേധാവികള്ക്ക് രാവിലെ 7 മുതല് ഉച്ചയ്ക്ക് 12 വരെയും രാവിലെ 8 മുതല് ഉച്ചയ്ക്ക് 1 വരെയും രാവിലെ 9 മുതല് ഉച്ചയ്ക്ക് 2 വരെയും രാവിലെ 10 മുതല് വൈകിട്ട് 3 വരെ എന്നിങ്ങനെയുള്ള വര്ക്ക് ഷെഡ്യൂളുകള് തീരുമാനിക്കാവുന്നതാണെന്നും അധികൃതര് അറിയിച്ചിട്ടുണ്ട്. ഗതാഗതക്കുരുക്ക് ഒഴിവാക്കാന് റോയല് ഒമാന് പോലീസ് വ്യാഴം, ശനി ദിവസങ്ങളില് രാജ്യത്തുടനീളമുള്ള വിവിധ റോഡുകളില് ട്രക്കുകളുടെ സഞ്ചാരത്തിന് നിയന്ത്രണം ഏര്പ്പെടുത്തിയിട്ടുണ്ട്. മസ്കത്ത് ഗവര്ണറേറ്റിലെ പ്രധാന റോഡുകള്, ദാഖിലിയ റോഡ് (മസ്കത്ത്, – ബിദ്ബിദ് പാലം), ബാത്തിന ഹൈവേ (മസ്കത്ത് – ഷിനാസ്) എന്നിവിടങ്ങളില് വ്യാഴാഴ്ച ഉച്ചയ്ക്ക് 12 മുതല് വൈകുന്നേരം 4 വരെയും, ശനിയാഴ്ച വൈകിട്ട് 4 മുതല് രാത്രി 10 വരെയുമാണ് ട്രക്കുകളുടെ ഗതാഗതം നിരോധിച്ചിരിക്കുന്നത്.