പ്രവാസികളുടെ ഡ്രൈവിങ് ലൈസന്‍സ് പുനഃപരിശോധിക്കാന്‍ ഒരുങ്ങി കുവൈത്ത്.ഡ്രൈവിങ് ലൈസന്‍സ് മാനദണ്ഡങ്ങള്‍ പാലിക്കാത്ത പ്രവാസികള്‍ക്കെതിരായ നടപടി തുടരുമെന്ന് അധികൃതര്‍ അറിയിച്ചു.
കുവൈത്തിലെ റോഡുകളില്‍ വര്‍ധിച്ചുവരുന്ന ഗതാഗതക്കുരുക്ക് പരിഹരിക്കുന്നതിന്‍റെ ഭാഗമായാണ് പ്രവാസികളുടെ ഡ്രൈവിംഗ് ലൈസന്‍സ് പുനഃപരിശോധിക്കാന്‍ അധികൃതര്‍ ഒരുങ്ങുന്നത്. യൂണിവേഴ്സിറ്റി ബിരുദവും കുറഞ്ഞത് 600 കുവൈത്ത് ദിനാര്‍ ശമ്ബളവും ഇല്ലാത്ത എല്ലാ പ്രവാസികളുടെയും ഡ്രൈവിങ് ലൈസന്‍സ് പിന്‍വലിക്കാന്‍ ഉന്നത അധികാരികള്‍ കര്‍ശന നിര്‍ദ്ദേശം നല്‍കിയതായി പ്രാദേശിക മാധ്യമമായ അല്‍ ജരിദ റിപ്പോര്‍ട്ട് ചെയ്തു.
പരിശോധന പൂര്‍ത്തിയാകുന്നതോടെ മൂന്ന് ലക്ഷത്തോളം പ്രവാസികളുടെ ഡ്രൈവിങ് ലൈസന്‍സുകള്‍ പിന്‍വലിക്കുമെന്നാണ് സൂചനകള്‍. റമദാന്‍ ആരംഭിച്ചതിന് ശേഷം ഗതാഗത കുരുക്കില്‍ വീര്‍പ്പുമുട്ടുകയാണ് കുവൈത്ത്. നേരത്തെ തിരക്ക് കുറക്കാന്‍ സര്‍ക്കാര്‍-സ്വകാര്യ ജീവനക്കാര്‍ക്കായി ഫ്ലക്സിബിള്‍ സമയം നടപ്പിലാക്കിയെങ്കിലും ഫലം കണ്ടില്ല.ഓരോ വര്‍ഷവും വര്‍ധിച്ചു വരുന്ന വാഹനങ്ങളെ ഉള്‍ക്കൊള്ളാന്‍ രാജ്യത്തെ നിരത്തുകള്‍ക്കു കഴിയാത്തതാണ് ഗതാഗതക്കുരുക്കിനുള്ള പ്രധാന കാരണമായി ചൂണ്ടിക്കാണിക്കപ്പെടുന്നത്.
