കുവൈത്ത് സിറ്റി: ഏത് വിഷയത്തിലായാലും നിയമം പാലിക്കുവാന്‍ എല്ലാവരും ബാധ്യസ്ഥരാണെന്ന് കുവൈത്ത് ഉപപ്രധാനമന്ത്രിയും ആഭ്യന്തര മന്ത്രിയുമായ ശൈഖ് തലാല്‍ ഖാലിദ് അല്‍ അഹമ്മദ് അല്‍ സബാഹ്. കഴിഞ്ഞ ദിവസം നടന്ന എം.ഒ.ഐ ഓഫീസര്‍മാരുടെ പരേഡില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
രാജ്യം അഭിമുഖീകരിക്കുന്ന അപകടങ്ങളും വെല്ലുവിളികളും വര്‍ധിച്ചുവരുന്ന സാഹചര്യത്തില്‍ ഉദ്യോഗസ്ഥര്‍ക്ക് കാര്യമായ ഉത്തരവാദിത്തങ്ങള്‍ വഹിക്കാനുണ്ട്. സ്ഥാനക്കയറ്റം ലഭിച്ച ഓഫീസര്‍മാരെ അഭിനന്ദിച്ച ശൈഖ് തലാല്‍ ജീവനക്കാരുടെ എല്ലാ അവകാശങ്ങളും സംരക്ഷിക്കുമെന്ന് ഉറപ്പ് നല്‍കി. പുതുതായി ചുമതലയേറ്റ 762 ബ്രിഗേഡിയര്‍മാര്‍ക്ക് കുവൈത്ത് അമീറും കിരീടാവകാശിയും ആശംസകള്‍ നേര്‍ന്നു.
