കുവൈത്ത് സിറ്റി : അന്താരാഷ്ട്ര ശ്രീകൃഷ്ണ കേന്ദ്രം കുവൈറ്റ് ചാപ്റ്റര് ‘വൈഷ്ണവം – 2023’ വിപുലമായ പരിപാടികളോടെ സംഘടിപ്പിച്ചു.
അബ്ബാസിയ ഭാരതീയ വിദ്യാഭവൻ സ്കൂള് ഓഡിറ്റോറിയത്തില് നടന്ന സാംസ്കാരിക സമ്മേളനം പ്രശസ്ത സിനിമ നിര്മ്മാതാവും അന്താരാഷ്ട്ര ശ്രീകൃഷ്ണ കേന്ദ്രം ജനറല് സെക്രട്ടറിയുമായ ശശി അയ്യഞ്ചിറ ഭദ്രദീപം കൊളുത്തി ഉദ്ഘാടനം ചെയ്തു. ഐ.എസ്.കെ കുവൈത്ത് ചാപ്റ്റര് പ്രസിഡൻറ് ജയകൃഷ്ണ കുറുപ്പ് അധ്യക്ഷത വഹിച്ചു. രക്ഷാധികാരി പി.ജി.ബിനു ആശംസ നേര്ന്നു കൊണ്ട് സംസാരിച്ചു. പ്രമുഖ ജീവകാരുണ്യ പ്രവര്ത്തകനായ മനോജ് മാവേലിക്കരയെയും മറ്റ് പ്രമുഖ വ്യവസായ പ്രമുഖരെയും സമ്മേളന വേദിയില് ആദരിച്ചു.
സുവനീര് മുഖ്യാതിഥി ശശി അയ്യഞ്ചിറ ഡോക്ടര് വെങ്കിടേഷിന് നല്കി പ്രകാശനം ചെയ്തു.സുനില് പാറകപാടത്ത് നിര്മ്മിച്ച ശ്രീ ഗുരുവായൂരപ്പ എന്ന വീഡിയോ ആല്ബം അദ്ദേഹം നേരിട്ട് ശ്രീ ശശിഅയ്യഞ്ചിറക്ക് നല്കി പ്രകാശനം നിര്വ്വഹിച്ചു. പുറം ലോകം അറിയപ്പെടാതിരുന്ന ഗായകരെ കണ്ടെത്തി സമൂഹത്തിന്റെ മുന്നില് എത്തിച്ച സംഗീത സംവിധായകനും ഗായകനുമായ മുരളി അപ്പാടത്തിന്റെ നേതൃത്വത്തില് നടന്ന ഗാനമേളയും നടന്നു.
ഐ.എസ്.കെ അംഗങ്ങള് അവതരിപ്പിച്ച ഭജൻ, പ്രമുഖ നൃത്ത വിദ്യാലയങ്ങളിലെ കുട്ടികള് അവതരിപ്പിച്ച നൃത്തനൃത്യങ്ങളും മറ്റ് കലാപരിപാടികളും അരങ്ങേറി. ജിജുന ഉണ്ണി അവതാരികയായിരുന്നു.
അതിഥികള്ക്കും കലാപരിപാടികള് അവതരിപ്പിച്ചവര്ക്കും വ്യവസായ സ്ഥാപന മേധാവികള്ക്കും സ്നേഹോപഹാരങ്ങള് വിതരണം ചെയ്തു.
വിവിധ സംഘടന നേതാക്കളും സാംസ്കാരിക പ്രവര്ത്തകരും ബിസിനസ് പ്രമുഖരുമായ ഒട്ടേറെ പേര് പങ്കെടുത്തു.ഐ.എസ്.കെ കുവൈത്ത് ചാപ്റ്റര് ജനറല് സെക്രട്ടറി ജിനേഷ്.വി.ജി സ്വാഗതവും ട്രഷറര് കെ.റ്റി.ഗോപകുമാര് നന്ദിയും പറഞ്ഞു.