കുവൈത്ത് സിറ്റി: കുവൈത്തില്‍ ഗതാഗത നിയമലംഘനത്തിനുള്ള പിഴ അടക്കാതെ വിദേശ യാത്രക്കൊരുങ്ങിയ പ്രവാസികളെ വിമാനത്താവളത്തില്‍ തടഞ്ഞു.
പിഴ കുടിശ്ശികയുള്ളവരെ യാത്ര ചെയ്യാൻ അനുവദിക്കില്ലെന്ന നിയമം നടപ്പാക്കിയ ആദ്യ ദിവസം 10 പേരുടെ യാത്രയാണ് മുടങ്ങിയത്. ഇതിനെ തുടര്‍ന്ന് ഇവര്‍ക്ക് യാത്ര റദ്ദാക്കി താമസസ്ഥലത്തേക്ക് തിരികെ പോരേണ്ടി വന്നു.
രാജ്യത്തിന്റെ വ്യോമ, കര, സമുദ്ര അതിര്‍ത്തികള്‍ വഴി യാത്ര ചെയ്യുന്ന എല്ലാ വിദേശികള്‍ക്കും തീരുമാനം ബാധകമാണ്. ഗതാഗത പിഴകള്‍ കുവൈത്ത് അന്തര്‍ ദേശീയ വിമാനത്താവളം, കര അതിര്‍ത്തി കവാടങ്ങള്‍, ഓരോ ഗവര്‍ണറേറ്റുകളിലും സ്ഥിതി ചെയ്യുന്ന ഗതാഗത വിഭാഗം ആസ്ഥാനങ്ങള്‍, ആഭ്യന്തര മന്ത്രാലയം ഇലക്‌ട്രോണിക് പോര്‍ട്ടല്‍, ജനറല്‍ ട്രാഫിക് ഡിപ്പാര്‍ട്ട്‌മെന്റുമായി അഫിലിയേറ്റ് ചെയ്‌ത ഏതെങ്കിലും വകുപ്പുകള്‍ എന്നിവ മുഖേനെ പിഴ അടക്കാം.
