മസ്കത്ത്: കേരളത്തനിമയും കോളജ് കാലത്തെ ആഹ്ലാദകരമായ ഓര്‍മകളും പങ്കുവെച്ച്‌ കോഴിക്കോട് ഫാറൂഖ് കോളജ് പൂര്‍വവിദ്യാര്‍ഥി സംഗമവും ഓണാഘോഷവും നടന്നു.
റൂവി സ്റ്റാര്‍ ഓഫ് കൊച്ചിൻ റസ്റ്റാറൻറില്‍ നടന്ന പരിപാടി ഫോസ ( ഫാറൂഖ് കോളജ് ഓള്‍ഡ് സ്റ്റുഡന്‍റ്സ് അസോസിയേഷൻ) പ്രസിഡന്റ് സുബൈര്‍ ഉദ്ഘാടനം ചെയ്തു.
വൈസ് പ്രസിഡൻറ് ഷീബ വിമോജ് സ്വാഗതം പറഞ്ഞു. കഴിഞ്ഞ ഒരു വര്‍ഷത്തെ പ്രവര്‍ത്തന റിപ്പോര്‍ട്ടും ഭാവിപദ്ധതികളും ജനറല്‍ സെക്രട്ടറി അനസ് വിശദീകരിച്ചു. ഫാറൂഖ് കോളജിലെയും ഒമാനിലെ വിവിധ ഇന്ത്യൻ സ്കൂളിലെയും നിര്‍ധന വിദ്യാര്‍ഥികളുടെ വിദ്യാഭ്യാസ ചെലവുകള്‍ ഏറ്റെടുത്തത് പ്രധാന നേട്ടമായി അദ്ദേഹം പറഞ്ഞു.
കെ. മുനീര്‍ വടകര മുഖ്യപ്രഭാഷണം നിര്‍വഹിച്ചു. ഓണാഘോഷ പരിപാടികളുടെ പ്രവാസി മലയാളികള്‍ക്കിടയില്‍ ഉണ്ടാകുന്ന സാഹോദര്യവും അവരുടെ പൈതൃക സ്മരണകളും അദ്ദേഹം ഊന്നിപ്പറഞ്ഞു. സംസ്ഥാനത്തെതന്നെ ഏറ്റവും പ്രമുഖവും ശ്രദ്ധേയവുമായ സ്ഥാപനങ്ങളിലൊന്നായി ഫാറൂഖ് കോളേജ് പരിണമിച്ചതെങ്ങനെയെന്നും എണ്ണമറ്റ വ്യക്തികളുടെ ജീവിതം രൂപപ്പെടുത്തിയ കലാലയം പകര്‍ന്നുനല്‍കിയ മൂല്യങ്ങളെയും അദ്ദേഹം പ്രശംസിച്ചു. കുട്ടികളുടെയും മുതിര്‍ന്നവരുടെയും കലാ കായിക പരിപാടികള്‍ നടന്നു. മുബീന, ഷംന, നിഷോര, നിദ, ജസീം, നിയാസ്, മുഹമ്മദ്, ഷാജി, മനോജ് തുടങ്ങിയവര്‍ നേതൃത്വം നല്‍കി.
