കുവൈത്ത് സിറ്റി: കുവൈത്തിലെ കോവിഡ് സാഹചര്യം ഏറെ മെച്ചപ്പെട്ടതായി ആരോഗ്യമന്ത്രാലയം. രാജ്യത്താകെ 50 പേര് മാത്രമാണ് വിവിധ ആശുപത്രികളിലായി ചികിത്സയിലുള്ളത്.
കഴിഞ്ഞ അഞ്ചു ദിവസത്തിനിടെ പുതിയ ഒരാള്‍പോലും കോവിഡ് ബാധയെ തുടര്‍ന്ന് ആശുപത്രികളില്‍ എത്തിയിട്ടില്ലെന്നും കോവിഡ് മഹാമാരി ആരംഭിച്ചതിനുശേഷമുള്ള ഏറ്റവും മികച്ച ആരോഗ്യ സാഹചര്യമാണ് ഇപ്പോള്‍ രാജ്യത്തുള്ളതെന്നും ആരോഗ്യ മന്ത്രാലയത്തിന് കീഴിലെ ഫീല്‍ഡ് ആശുപത്രി ഡയറക്ടര്‍ ഡോ. മുഹമ്മദ് അല്‍ ഹുമൈദാന്‍ പറഞ്ഞു.
പുതുതായി രോഗം സ്ഥിരീകരിക്കുന്നവരുടെ എണ്ണം ഗണ്യമായി കുറയുകയും രോഗമുക്തി നിരക്ക് വര്‍ധിക്കുകയും ചെയ്തതോടെയാണ് ആശുപത്രികള്‍ പലതും കാലിയായത്. കഴിഞ്ഞ ദിവസം ആരോഗ്യമന്ത്രാലയം പുറത്തുവിട്ട കണക്കു പ്രകാരം 662 ആക്റ്റിവ് കേസുകളാണ് രാജ്യത്തുള്ളത്. ഇതില്‍ 50 പേര് മാത്രമാണ് ചികിത്സ തേടിയത്. ബാക്കിയുള്ളവര്‍ രോഗലക്ഷണങ്ങളോ ഗുരുതര സാഹചര്യമോ ഇല്ലാതെ വീടുകളില്‍ ക്വാറന്‍റീനില്‍ കഴിയുകയാണ്. പത്തു പേര്‍ക്ക് മാത്രമാണ് ഗുരുതര ആരോഗ്യ പ്രശ്നങ്ങളുള്ളത്. 0.25 ശതമാനം ആയിരുന്നു കഴിഞ്ഞ ദിവസങ്ങളിലെ രോഗസ്ഥിരീകരണ നിരക്ക്.
വാക്സിനേഷന് കാമ്ബയിന്‍ ഊര്‍ജിതമാക്കിയത് വ്യാപനം കുറക്കാന്‍ സഹായകമായിട്ടുണ്ടെന്നാണ് അധികൃതരുടെ വിലയിരുത്തല്‍. രോഗികള്‍ ഇല്ലാത്തതിനാല്‍ കോവിഡ് ചികിത്സക്കായി മാത്രം സജ്ജീകരിച്ചിരുന്ന പല വാര്‍ഡുകളും തീവ്ര പരിചരണ യൂനിറ്റുകളും ഇതിനകം അടച്ചു.
രോഗികള്‍ ഇല്ലാത്തതിനാല്‍ മിശ്രിഫ് ഫെയര്‍ ഗ്രൗണ്ടിലെ എട്ടാം നമ്ബര്‍ ഹാളില്‍ പ്രവര്‍ത്തിച്ചിരുന്ന ഫീല്‍ഡ് ആശുപത്രിയും പ്രവര്‍ത്തനം അവസാനിപ്പിച്ചതായി ഫീല്‍ഡ് ആശുപത്രി ഡയറക്ടര്‍ ഡോ. മുഹമ്മദ് അല്‍ ഹുമൈദാന്‍ കൂട്ടിച്ചേര്‍ത്തു.
