മസ്കത്ത്: രാജ്യത്തെ സ്വകാര്യ സ്ഥാപനങ്ങള്ക്ക് പ്രവാസി തൊഴിലാളികളെ നിയമിക്കുന്നതിനായി അനുവദിച്ചിട്ടുള്ള ലൈസന്സുകളുടെ കാലാവധി ദീര്ഘിപ്പിച്ചു.
2021 ഡിസംബര് 31 വരെയാണ് ലൈസന്സുകളുടെ കാലാവധി നീട്ടിയത്. ഒമാന് തൊഴില് മന്ത്രാലയമാണ് ഇക്കാര്യം അറിയിച്ചത്. നേരത്തെ ഇത്തരം ലൈസന്സുകളുടെ കാലാവധി മന്ത്രാലയം 2021 സെപ്റ്റംബര് 30 വരെ നീട്ടി നല്കിയിരുന്നു. ഇത് അവസാനിക്കാനിരിക്കവെയാണ് പുതിയ തീരുമാനം.
കോവിഡ് വ്യാപനത്തെ തുടര്ന്ന് ഉണ്ടായ പ്രയാസങ്ങളില് നിന്ന് കരകയറുന്നതിന് രാജ്യത്തെ സ്വകാര്യ മേഖലയ്ക്ക് കൂടുതല് ഇളവുകള് നല്കുന്നതിന്റെ ഭാഗമായാണ് നടപടി. പ്രവാസി തൊഴിലാളികളുടെ തൊഴില് കരാറുകള് രജിസ്റ്റര് ചെയ്യുന്നതുമായി ബന്ധപ്പെട്ട നടപടികള് പൂര്ത്തിയാക്കുന്നതിന് രാജ്യത്തെ സ്വകാര്യ മേഖലയിലെ സ്ഥാപനങ്ങള്ക്ക് കൂടുതല് സമയം അനുവദിക്കാന് തീരുമാനിച്ചതായി മന്ത്രാലയം നേരത്തെ അറിയിച്ചിരുന്നു.