കുവൈത്ത് സിറ്റി: പോലീസ് ഉദ്യോഗസ്ഥര്ക്ക് പെപ്പര് സ്പ്രേ ഉപയോഗിക്കാന് അനുമതി നല്കി കുവൈത്ത്.
പോലീസ് ഉദ്യോഗസ്ഥര്ക്ക് ആഭ്യന്തര മന്ത്രാലയത്തിലെ പബ്ലിക് സെക്യൂരിറ്റി സെക്ടര് അസിസ്റ്റന്റ് അണ്ടര് സെക്രട്ടറി മേജര് ജനറല് ഫറാജ് അല് സൗബിയാണ് ഇത് സംബന്ധിച്ച ഉത്തരവ് പുറപ്പെടുവിച്ചത്.
സ്വയരക്ഷക്കായോ അല്ലെങ്കില് മറ്റൊരാള് ആക്രമിക്കപ്പെടുമ്ബോള് അവര്ക്ക് സംരക്ഷണം നല്കാനോ വേണ്ടി പോലീസ് ഉദ്യോഗസ്ഥര്ക്ക് കുവൈത്തില് പെപ്പര് സ്പ്രേ ഉപയോഗിക്കാം. രാജ്യത്തെ നിയമ വ്യവസ്ഥ ശക്തിപ്പെടുത്താനും ക്രമസമാധാന നില ഭദ്രമാക്കാനുമാണ് ഇത്തരമൊരു നടപടി സ്വീകരിച്ചതെന്ന് അധികൃതര് അറിയിച്ചു.
രാജ്യത്തെ പോലീസ് നിയമം ഉള്പ്പെടെയുള്ള വിവിധ നിയമങ്ങള്ക്ക് അനുസൃതമായാണ് തീരുമാനമെടുത്തതെന്നും ആഭ്യന്തര മന്ത്രാലയം വ്യക്തമാക്കി.