മസ്കത്ത്: ജോര്‍ഡന്‍ ഇന്റര്‍നാഷനല്‍ ഫുട്ബാള്‍ ടൂര്‍ണമെന്റിലെ ആദ്യ മത്സരത്തില്‍ സുല്‍ത്താനേറ്റിന് വിജയം. അമ്മാനിലെ കിങ് അബ്ദുല്ല രണ്ടാമന്‍ സ്റ്റേഡിയത്തില്‍ നടന്ന മത്സരത്തില്‍ പെനാല്‍റ്റി ഷൂട്ടൗട്ടിലൂടെയായിരുന്നു ഇറാഖിനെ തോല്‍പിച്ചത്. കളിയുടെ മുഴുവന്‍ സമയവും ഓരോ ഗോള്‍വീതം അടിച്ച്‌ ഇരുടീമും സമനിലയില്‍ പിരിഞ്ഞതോടെയാണ് പെനാല്‍റ്റി ഷൂട്ടൗട്ടിലേക്ക് നീങ്ങിയത്. ആദ്യപകുതിയില്‍ നിരവധി അവസരങ്ങള്‍ തുറന്നുകിട്ടിയെങ്കിലും ഗോള്‍ മാത്രം അകന്നുനിന്നു.
രണ്ടാം പകുതിയുടെ 83ാം മിനിറ്റില്‍ ഉമര്‍ അല്‍ മാലികിയാണ് ഒമാനുവേണ്ടി വലകുലുക്കിയത്. ഫ്രീ കിക്കിലൂടെ ലഭിച്ച പന്ത് ഹെഡ് ചെയ്ത് വലയിലെത്തിക്കുകയായിരുന്നു. ഇതോടെ കൂടുതല്‍ ആക്രമിച്ച്‌ കളിച്ച ഇറാഖ് ഒമാന് ഗോള്‍മുഖത്ത് ഭീതിവിതക്കുകയും ചെയ്തു. ഒടുവില്‍ മത്സരം അവസാനിക്കാന്‍ നിമിഷങ്ങള്‍ മാത്രം ശേഷിക്കെ ഇറാഖ് ഗോള്‍ മടക്കുകയായിരുന്നു.
പെനാല്‍റ്റി ഷൂട്ടൗട്ടില്‍ ഇറാഖിന്‍റെ രണ്ട് ഷോട്ടുകള്‍ തടുത്തിട്ട ഗോള്‍കീപ്പറാണ് ഒമാന്‍റെ വിജയം എളുപ്പമാക്കിയത്.
ഇന്നലെ നടന്ന രണ്ടാം മത്സരത്തില്‍ ആതിഥേയരായ ജോര്‍ഡന്‍ സിറിയയെ പരാജയപ്പെടുത്തി. രണ്ട് ഗോളുകള്‍ക്കായിരുന്നു സിറിയയുടെ വിജയം. തിങ്കളാഴ്ച നടക്കുന്ന ഫൈനലില്‍ ഒമാന് – ജോര്‍ഡനെ നേരിടും.
