പല ജീവവര്ഗങ്ങളും റെഡ് ഡേറ്റാ ബുക്കിലാണെന്ന് നമ്മള് കേട്ടിട്ടുണ്ട്. എന്താണ് റെഡ് ഡേറ്റാ ബുക്ക്, അത് എന്തിന് വേണ്ടിയാണ്?
അറിയാം ഈ കാര്യങ്ങള്
ജീവികളുടെ ശോഷണം സൂചിപ്പിക്കുന്ന ഏറ്റവും പുതിയ വിവരങ്ങള് നല്കുന്ന പട്ടിക റെഡ് ഡേറ്റാ ബുക്ക് എന്ന പേരില് അറിയപ്പെടുന്നു. നിലനില്പിനായി അന്തിമപോരാട്ടം നടത്തുന്നവരും ഭീഷണികള് നേരിടുന്നവരും ഇതിലുണ്ട്. പ്രാദേശിക തലത്തിലും, രാഷ്ട്രാന്തരതലത്തിലും ഗവേഷണങ്ങള് നടത്തി തയ്യാറാക്കുന്ന സമഗ്ര റിപ്പോര്ട്ടാണിത്. IUCNNR (International Union for the Conservation of Natural and National Research)എന്ന അന്താരാഷ്ട്ര സംഘടനയാണ് ഇത് തയ്യാറാക്കുന്നത്. ആഗോളതലത്തില് ജൈവസംരക്ഷണത്തിന് രാഷ്ട്രീയ തീരുമാനമെടുക്കാന് രാഷ്ട്രങ്ങളെ ഇതു പ്രേരിപ്പിക്കുന്നു.
സസ്യങ്ങള്ക്കും ജന്തുക്കള്ക്കും വെവ്വേറെ ഡേറ്റാ ബുക്കുകളാണ് പ്രസിദ്ധീകരിക്കുക. വംശനാശഭീഷണിയുള്ളജീവികളുടെ ഈ സ്ഥിതിവിവരപട്ടിക കൂടെക്കൂടെ പരിഷ്ക്കരിക്കും. യുഗങ്ങള് എടുത്താണ് ഓരോ സ്പീഷീസും ഉടലെടുക്കുന്നത് എന്നതിനാല് ജീവികളുടെ വംശനാശം ലോകത്തെ അലട്ടുന്ന പ്രധാനപ്രശ്നമാണ്. കാരണം ഇതാണ്
ജീവികളുടെ തിരോധാനത്തിനുകാരണം അവയുടെ ആവാസകേന്ദ്രങ്ങളിലുള്ള മനുഷ്യന്റെ കടന്നാക്രമണമാണ്. ആയിരക്കണക്കിന് ജന്തുക്കളും സസ്യങ്ങളും ഭീഷണിയിലാണ്. പ്രതിവര്ഷം ഓരോ ജന്തുവീതം ഇല്ലാതാകുന്നുവെന്നാണ് കണക്ക്. പരിണാമശാസ്ത്രപ്രകാരം ജീവികള് ഇല്ലാതാകുന്നത് സ്വാഭാവികമാണ്. എന്നാല് ഈ ഇല്ലായ്മ ലക്ഷക്കണക്കിന് വര്ഷങ്ങള് കൊണ്ടാണ് സംഭവിക്കാറുള്ളത്. എന്നാല് ഇവയെല്ലാം പെട്ടെന്ന് ഇല്ലാതാകുന്നതാണ് ഇന്നത്തെ കാഴ്ച. ഇത് അസ്വാഭാവികമാണെന്ന് പഠനങ്ങള് പറയുന്നു. അമിതമായ വേട്ടയാടല്, കച്ചവടം എന്നിവയൊക്കെയാണ് പ്രധാന കാരണങ്ങള്. പരിസ്ഥിതി അസന്തുലനം, പരിസരമലിനീകരണം എന്നിവ മൂലം പിടിച്ചുനില്ക്കാനാകാതെ പല ജീവികളും ഇല്ലാതാകുന്നു. പ്രകൃതിക്ഷോഭങ്ങളും മറ്റൊരു കാരണമാണ്. വളര്ത്തിനങ്ങളേക്കാള് വന്യയിനങ്ങളാണ് കൂടുതല് നഷ്ടപ്പെടുന്നത്. ഇരുപതാംനൂറ്റാണ്ടിലാണ് ഏറ്റവും അധികം ജന്തുക്കള് വംശനാശത്തിന് വിധേയമായിട്ടുള്ളത്. ഇന്ത്യയിലുള്ള ജന്തുക്കളില് പ്രത്യേകിച്ചും സസ്തനികളില് മൂന്നിലൊന്ന് ഭീഷണി നേരിട്ടുകൊണ്ടിരിക്കുന്നു. ജലജീവികളുടെ അവസ്ഥയ്ക്കും മാറ്റമില്ല. വനമേഖലകള് വേണ്ടത്ര സംരക്ഷിതമായില്ലെങ്കില് സസ്യജന്തുവര്ഗങ്ങള് പലതും അപ്രത്യക്ഷമാകാന് അധികസമയം വേണ്ടിവരില്ല. സസ്യ, ജന്തുജാലങ്ങളുടെ വിന്യാസവും വ്യാപനവുമുണ്ടാകുന്നതാണ് ഈ പ്രശ്നത്തിനുള്ള പ്രതിവിധി.
എന്തു ചെയ്യാം?
പരിസ്ഥിതി നിയമങ്ങള് നമ്മള് പരാമാവധി പാലിക്കണം. വന്യജീവി സങ്കേതങ്ങള്, ദേശീയോദ്യാനങ്ങള്, കാവുകള് എന്നിവയെ നിലനിറുത്തണം. വന്യജീവി ബോധവത്കരണം നടത്തുക, റെഡ് ഡേറ്റാബുക്കിനെ പരമാവധി പരിചയപ്പെടുത്തുക, പൗരധര്മ്മമായി പരിസ്ഥിതി പ്രവര്ത്തനം സ്വീകരിക്കുക… ഇങ്ങനെ ഒട്ടേറെ കാര്യങ്ങള് ചെയ്യാം. ഓരോ ജീവിയേയും നിലനിറുത്താനും വംശം സംരക്ഷിക്കാനും മുന്കാലങ്ങളില് നമ്മുടെ പൂര്വികര് നിതാന്ത ജാഗ്രത പുലര്ത്തിയിരുന്നു. വന്യജീവി സംരക്ഷണത്തിനായി ഒരു നിയമം വന്നത് ഭാരതത്തിലായിരുന്നു. എത്രയും വേഗം പ്രകൃതിയെ സംംരക്ഷിക്കാനുള്ള ഇടപെടലുകള് ഉണ്ടാകണം. അല്ലെങ്കില് വൈകി പോകും.
കൈകോര്ക്കാം
വംശനാശത്തെ നേരിടാന് നിരവധി നീക്കങ്ങള് ഉണ്ടായിട്ടുണ്ട്. 1948 ല് സ്ഥാപിതമായ IUCNNR അതിലൊന്നാണ്. 1200 ലധികം അംഗങ്ങളുള്ള 60 ലധികം രാജ്യങ്ങളില് പ്രവര്ത്തിക്കുന്ന ഈ സംഘടനയുടെ ആസ്ഥാനം സ്വിറ്റ്സര്ലാന്ഡാണ്. 1961 ലാണ് WWF(World Wide fund) നിലവില് വന്നത്. സ്വിറ്റ്സര്ലാന്ഡ് തന്നെയാണ് ആസ്ഥാനം. പ്രകൃതി സംരക്ഷണ പദ്ധതികളും പരിസ്ഥിതി പരിശീലന പ്രവര്ത്തനങ്ങളും സമന്വയിപ്പിക്കുകയാണ് ഈ സംഘടനയുടെ പ്രധാന ദൗത്യം. ഇതോടൊപ്പം വംശനാശഭീഷണി നേരിടുന്ന ജന്തുക്കളുടെയും സസ്യങ്ങളുടെയും കച്ചവടം നിയന്ത്രിക്കുന്നതിനുള്ള CITES (Convention on Intern-ational Trade in Endangered Species of Wild Fauna and Flora) എന്ന അന്താരാഷ്ട്രസംഘടനയും നിലവില് ഉണ്ട്. ഇതൊക്കെയുണ്ടെങ്കിലും വംശനാശത്തെ അനുകൂലിക്കുന്ന ഘടകങ്ങള് ഏറിവരികയാണ്. ഇന്ത്യന് ചീറ്റകള് അപ്രത്യക്ഷമായതും വിവിധതരം ഓര്ക്കിഡുകള് ഇല്ലാതായതുമെല്ലാം പാരിസ്ഥിതിക നാശത്തിന്റെ പിന്നാലെയാണ് എന്ന് നമ്മള് അറിയണം.
അശോകമാതൃകഹരിതാഭം
അശോകചക്രവര്ത്തിയുടെ വിളംബരത്തില്, കൊല്ലാന് പാടില്ലാത്ത മൃഗങ്ങള്, പക്ഷികള് എന്നിവയുടെ പട്ടികയുണ്ടായിരുന്നു. വനങ്ങളില് തീയിടരുത് എന്നും അദ്ദേഹം അനുശാസിച്ചു. വഴിയോരത്ത് തണല്വൃക്ഷങ്ങള് നടുക, ജലാശയങ്ങള് കുത്തുക, പഴവര്ഗ്ഗത്തോട്ടങ്ങള് നട്ടുവളര്ത്തുക, പുഴയോരത്തെ ഹരിതാഭമാക്കുക തുടങ്ങി അനേകം കാര്യങ്ങള് അദ്ദേഹം പ്രകൃതിക്ക് വേണ്ടി ചെയ്തു.