കുവൈറ്റ്: ഇന്ത്യയും കുവൈറ്റും തമ്മില് വര്ധിച്ചു വരുന്ന പ്രതിരോധ രംഗത്തെ സഹകരണത്തിന്റെ ഭാഗമായി, ഇന്ത്യന് നേവിയുടെ മൂന്നു കപ്പലുകള് ഇന്നലെ കുവൈറ്റില് എത്തിയതായി കുവൈറ്റിലെ ഇന്ത്യന് എംബസി അധികൃതര് അറിയിച്ചു.
പ്രതിരോധ രംഗത്തെ പരിശീലന വിഭാഗത്തില് പെടുന്ന ഐഎന് എസ്തീര്, ഐ എന് എസ് സുജാത, തീരസംരക്ഷണ സേനയുടെ സാരഥി എന്നീ കപ്പലുകളാണ് കുവൈറ്റിലെ ശുവൈഖ് പോര്ട്ടില് എത്തിയത്.
കുവൈറ്റ് നാവിക സേനാ അധികൃതരും അതിര്ത്തി രക്ഷാ സേനയും ഇന്ത്യന് എംബസി വക്താക്കളും ചേര്ന്ന് ഉൗഷ്മളമായ വരവേല്പ്പാണ് ശുവൈഖ് തുറമുഖത്ത് ഇന്ത്യന് കപ്പലുകള്ക്ക് നല്കിയത്. കുവൈറ്റിലെ വിവിധ സ്കൂളുകളിലെ വിദ്യാര്ഥികളും ശുവൈഖ് പോര്ട്ടില് കപ്പലുകളെ സ്വീകരിക്കാന് എത്തിയിരുന്നു. നാലു ദിവസത്തോളം കുവൈറ്റില് തങ്ങുന്ന കപ്പലുകള് സന്ദര്ശിക്കാന് ഇന്ത്യക്കാര്ക്ക് സൗകര്യമൊരുക്കിയിട്ടുണ്ട്.