ലണ്ടന്: സസെക്സിലെ ഡ്യൂക്കും ഡച്ചസുമായ ഹാരി രാജകുമാരനും മേഗന് മാര്ക്കിളും രാജകുടുംബത്തിനൊപ്പം ക്രിസ്മസ് ആഘോഷിക്കാന് എത്തില്ലെന്ന് റിപ്പോര്ട്ട്. ഹാരി രാജകുമാരന്റെ ഓര്മ പുസ്തകം പുറത്തിറങ്ങാനിരിക്കെ പിതാവും ബ്രിട്ടന്റെ പുതിയ രാജാവുമായി ചാള്സ് മൂന്നാമന്റെ ക്ഷണം ദമ്ബതികള് നിരസിച്ചേക്കുമെന്നാണ് റിപ്പോര്ട്ടുകള് സൂചിപ്പിക്കുന്നത്.
2023 ജനുവരി 10നാണ് ഹാരിയുടെ ഓര്മപുസ്തകം പുറത്തിറങ്ങുക. ‘സ്പെയര്’ എന്നാണ് പുസ്തകത്തിന്റെ പേര്. രാജകുടുംബവും ഹാരി രാജകുമാരനും തമ്മിലുള്ള ഭിന്നത തീവ്രമായി തന്നെ തുടരുകയാണെന്നാണ് റിപ്പോര്ട്ടുകള്. കടുത്ത മനസികാഘാതങ്ങളില് നിന്ന് സ്നേഹത്തിലൂടെ മോചനം നേടിയതാണ് പുസ്തകത്തിലൂടെ ഹാരി രാജകുമാരന് തുറന്നെഴുതുന്നത്.
2020 മുതല് രാജപദവികള് ഉപേക്ഷിച്ച് ഭാര്യ മേഗനും രണ്ട് മക്കള്ക്കുമൊപ്പം കാലിഫോര്ണിയയിലാണ് ഹാരിയുടെ താമസം. 416 പേജുള്ള പുസ്തകത്തില് ഹാരി തന്റെ കഥ തന്നെയാണ് പറയുന്നത്. 25 വര്ഷം മുമ്ബ് അമ്മ ഡയാനയുടെ മരണത്തോട് രാജകുമാരന് എങ്ങനെ പ്രതികരിച്ചു, അതിനുശേഷം ഡയാനയുടെ വിയോഗം ജീവിതത്തെ എങ്ങനെ ബാധിച്ചു എന്നതും പുസ്തകത്തിലെ പ്രതിപാദ്യമാണ്. ഇംഗ്ലീഷ് അടക്കം 16 ഭാഷകളില് പുസ്തകം പുറത്തിറങ്ങും. കൂടാതെ ഹാരി രാജകുമാരന്റെ സ്വരത്തിലുള്ള ഓഡിയോ ബുക്കും ജനുവരിയില് പുറത്തിറങ്ങും.