മസ്കത്ത്: മസ്കത്ത് കെ.എന്.ബി.എ ഒമാനും കെ.എന്.ബി.എ യു.എ.ഇയും സംയുക്തമായി സംഘടിപ്പിച്ച ഇന്റര്നാഷനല് നേറ്റീവ് ബാള് എവര്റോളിങ് ട്രോഫിക്കുവേണ്ടിയുള്ള നാടന് പന്തുകളി ടൂര്ണമെന്റ് ഫൈനലില് കെ.എന്.ബി.എ ഒമാന് ജേതാക്കളായി. അഞ്ച് ടീമുകള് ഏറ്റുമുട്ടിയ വാശിയേറിയ ലീഗ് മത്സരങ്ങള്ക്ക് ശേഷം കെ.എന്.ബി.എ ഒമാനും കെ.എന്.ബി.എ യു.എ.ഇയും ഫൈനലില് ഏറ്റുമുട്ടി.
കാണികളെ ആവേശത്തിന്റെ മുള്മുനയില് നിര്ത്തിയ അത്യന്തം മനോഹരമായ പോരാട്ടത്തിനൊടുവില് കെ.എന്.ബി.എ ഒമാന് കപ്പ് ഉയര്ത്തി. എവര്റോളിങ് ട്രോഫികള്ക്ക് പുറമെ കാഷ് അവാര്ഡുകളും മറ്റു നിരവധി സമ്മാനങ്ങളും സംഘാടകര് ഒരുക്കിയിരുന്നു. ആദ്യമായാണ് ഒരു രാജ്യാന്തര നാടന് പന്തുകളി ടൂര്ണമെന്റ് അരങ്ങേറിയിരിക്കുന്നതെന്നും വരും വര്ഷങ്ങളിലും മത്സരങ്ങള് തുടരുമെന്ന് കെ.എന്.ബി.എ അസോസിയേഷന് അറിയിച്ചു.