ശൈഖ് അഹമ്മദ് നവാഫ് അല് അഹമ്മദ് അസ്സബാഹിനെ പ്രധാനമന്ത്രിയായി വീണ്ടും ചുമതലപ്പെടുത്തി ഞായറാഴ്ച അമീരി ഉത്തരവ് പുറപ്പെടുവിച്ചു. നിലവില് കാവല് മന്ത്രിസഭയെ നയിക്കുന്നത് ശൈഖ് അഹമ്മദ് നവാഫാണ്. അമീരി ഉത്തരവ് വന്നതോടെ ഈ ആഴ്ചതന്നെ മന്ത്രിമാരെ തെരഞ്ഞെടുക്കുമെന്നും വൈകാതെ സത്യപ്രതിജ്ഞ ഉണ്ടാകുമെന്നുമാണ് സൂചനകള്.
പ്രധാനമന്ത്രിയാണ് മന്ത്രിമാരെ നാമനിര്ദേശം ചെയ്യുക. എംപിമാരുമായുള്ള അഭിപ്രായ ഭിന്നതകളും മന്ത്രിമാര്ക്കെതിരെ ദേശീയ അസംബ്ലിയില് കുറ്റവിചാരണ പ്രമേയം കൊണ്ടുവരാനുമുള്ള നീക്കത്തിനിടെ ഈ വര്ഷം ഫെബ്രുവരി 23നാണ് സര്ക്കാര് രാജി സമര്പ്പിച്ചത്. രാജി സമര്പ്പിച്ചതിനാല് പാര്ലമെന്റ് സമ്മേളനത്തില് നിന്ന് സര്ക്കാര് വിട്ടു നില്ക്കുകയും സഭാ നടപടികള് തടസ്സപ്പെടുകയും ചെയ്തിരുന്നു.
ദേശീയ അസംബ്ലി തെരഞ്ഞെടുപ്പിന് പിറകെ 2022 ഒക്ടോബര് 17 നാണ് പ്രധാനമന്ത്രി ശൈഖ് അഹമ്മദ് നവാഫ് അല് അഹമ്മദ് അസ്സബാഹിന്റെ നേതൃത്വത്തില് നിലവിലുള്ള മന്ത്രിസഭ അധികാരമേറ്റത്. മന്ത്രിസഭയില് 11 പുതുമുഖങ്ങളും രണ്ടു വനിതകളും ഉള്പ്പെട്ടിരുന്നു. ദേശീയ അസംബ്ലിയിലേക്ക് വിജയിച്ച രണ്ടു എം.പിമാരും മന്ത്രിസഭയിലെത്തി. 15 അംഗ മന്ത്രിസഭയില് മുന് സര്ക്കാറിലെ മൂന്ന് പേരും അംഗങ്ങളായിരുന്നു.