കുവൈത്ത് സിറ്റി: ഇന്റര്‍ പാര്‍ലമെന്ററി യൂനിയന്റെ 146ാമത് (ഐ.പി.യു) സമ്മേളനത്തിന്റെ ഭാഗമായി ബഹ്റൈനില്‍ നടക്കുന്ന ഏകോപന യോഗങ്ങളില്‍ കുവൈത്ത് പാര്‍ലമെന്ററി പ്രതിനിധി സംഘം പങ്കെടുത്തു.
മേഖലയില്‍ പൊതുവായ ആശങ്കയുള്ള വിഷയങ്ങളില്‍ സമവായത്തിലെത്താന്‍ വിവിധ രാഷ്ട്രങ്ങള്‍ തമ്മിലുള്ള ഏകോപനത്തിന്റെ പ്രാധാന്യം കുവൈത്ത് അംഗങ്ങള്‍ ചൂണ്ടിക്കാട്ടി. പാര്‍ലമെന്ററി ഡിവിഷന്‍ അണ്ടര്‍ സെക്രട്ടറി എം.പി താമര്‍ അല്‍ ദാഫിരി, എം.പി അല്‍ മഹന്‍, എം.പി അല്‍ ഉബൈദ്, എം.പി ഖാലിദ് അല്‍ തമര്‍, എം.പി ജനന്‍ ബുഷെഹ്‌രി എന്നിവരടങ്ങുന്നതാണ് കുവൈത്ത് പ്രതിനിധി സംഘം.
ജനറല്‍ അസംബ്ലിയുടെയും സ്ഥിരം സമിതികളുടെയും സുസ്ഥിര വികസനം, ധനസഹായം, വ്യാപാരം, മനുഷ്യാവകാശം, ജനാധിപത്യ കമീഷനുകള്‍ എന്നിവയുടെ സെഷനുകളിലും പ്രതിനിധി സംഘം പങ്കെടുക്കും. ചേരിചേര രാജ്യങ്ങളുടെ പാര്‍ലമെന്റുകളുടെ യോഗങ്ങള്‍ക്കുപുറമെ യുവ പാര്‍ലമെന്റേറിയന്മാരുടെ ഫോറം, വനിത പാര്‍ലമെന്റേറിയന്മാരുടെ ഫോറം എന്നിവയിലും കുവൈത്ത് എം.പിമാര്‍ പങ്കെടുക്കുന്നുണ്ട്.
