കുവൈത്ത് സിറ്റി: കുവൈത്തിന്റെ ഹജ്ജ് ക്വോട്ട വര്ധിപ്പിക്കുന്നതിനായി സൗദി ഹജ്ജ് മന്ത്രാലയത്തിന് അപേക്ഷ നല്കിയതായി എന്ഡോവ്മെന്റ്, ഇസ്ലാമിക് അഫയേഴ്സ് മന്ത്രാലയത്തിലെ ഹജ്ജ്, ഉംറ കാര്യ വകുപ്പ് ഡയറക്ടര് സത്താം അല് മുസൈന് അറിയിച്ചു. രാജ്യത്തിന് ഈ വര്ഷം അനുവദിച്ച ക്വോട്ട 8,000 ആണ്.
ഓണ്ലൈന് വഴി 40000ത്തോളം അപേക്ഷകള് എത്തിയിരുന്നു. ഉംറയും ഹജ്ജും നിര്വഹിക്കാന് ബിദൂനികള്ക്ക് അവസരം നല്കണം എന്ന അപേക്ഷയും സൗദി ഹജ്ജ് മന്ത്രാലയത്തിന് സമര്പ്പിച്ചതായി സത്താം അല് മുസൈന് പറഞ്ഞു. സൗദി അധികൃതര് ഈ അഭ്യര്ഥന പഠിച്ചുകൊണ്ടിരിക്കുകയാണെന്നും ഉടന് പ്രതികരിക്കുമെന്നും അദ്ദേഹം കൂട്ടിച്ചേര്ത്തു.
കുവൈത്തില്നിന്നുള്ള തീര്ഥാടകരുടെ താമസസ്ഥലങ്ങളില് നിയോഗിക്കപ്പെട്ട പരിശോധന സംഘം ദൗത്യം പൂര്ത്തിയാക്കിയതായി അദ്ദേഹം പറഞ്ഞു. ഔദ്യോഗിക കാരവനുകള്, ഹോട്ടലുകള്, റെസിഡന്ഷ്യല് കെട്ടിടങ്ങള് എന്നിവയുമായി കരാര് ഉറപ്പിച്ചിട്ടുണ്ടെന്നും അദ്ദേഹം വ്യക്തമാക്കിയതായി മാധ്യമങ്ങള് റിപ്പോര്ട്ടു ചെയ്തു. കുവൈത്തില് ഈ വര്ഷം സ്വദേശികള്ക്കൊപ്പം പ്രവാസികള്ക്കും ഹജ്ജിന് അപേക്ഷിക്കാന് അവസരം ഉണ്ടായിരുന്നു. ജനുവരി 28 ആരംഭിച്ച രജിസ്ട്രേഷന് ഫെബ്രുവരി 29ന് അവസാനിച്ചു.