ന്യൂ യോര്ക്ക്: താനുമായുണ്ടായിരുന്ന ബന്ധം വെളിപ്പെടുത്താതിരിക്കാന് നടിക്ക് കൈക്കൂലി നല്കിയ കേസില് മുന് പ്രസിഡന്റ് ഡോണള്ഡ് ട്രംപ് അറസ്റ്റിലാകാനുള്ള സാധ്യത ശക്തമായതോടെ അതീവ ജാഗ്രതയില് അമേരിക്ക.
ട്രംപിനെതിരെ കുറ്റം ചുമത്താനുള്ള നടപടികള് അന്തിമഘട്ടത്തിലാണ്. ചൊവ്വാഴ്ച അദ്ദേഹം അറസ്റ്റിലായേക്കുമെന്ന റിപ്പോര്ട്ടും പുറത്തുവന്നതോടെ അനുയായികളോട് വലിയതോതിലുള്ള പ്രതിഷേധങ്ങള് സംഘടിപ്പിക്കാന് ട്രംപ് ആഹ്വാനം ചെയ്തിരുന്നു. തുടര്ന്നാണ് രാജ്യത്ത് സുരക്ഷ ശക്തമാക്കിയത്.
സ്റ്റോമി ഡാനിയല്സ് എന്ന നടിക്ക് 2016ല് പണം നല്കിയ കേസില് മാന്ഹാട്ടന് ജില്ലാ അറ്റോര്ണിയാണ് ട്രംപിനെതിരെ കുറ്റം ചുമത്താനുള്ള നടപടി സ്വീകരിക്കുന്നത്. നടപടിക്രമങ്ങള് പൂര്ത്തിയായാല് ക്രിമിനല് കേസില് കുറ്റം ചുമത്തപ്പെടുന്ന ആദ്യ മുന് പ്രസിഡന്റാകും അദ്ദേഹം. 2024ലെ പ്രസിഡന്റ് തെരഞ്ഞെടുപ്പില് മത്സരിക്കുമെന്ന് പ്രഖ്യാപിച്ചിട്ടുള്ള ട്രംപിന് ഇത് വലിയ തിരിച്ചടിയുമായേക്കും.