സക്രമെന്റോ: കാലിഫോര്‍ണിയയില്‍ സിഖ് ക്ഷേത്രത്തിനകത്ത് നടന്ന വെടിവെപ്പില്‍ രണ്ട് പേര്‍ക്ക് പരിക്കേറ്റു.
വെടിയേറ്റവരില്‍ ഒരാള്‍ ഇന്ത്യക്കാരനാണ്. സാക്രമെന്റോയിലെ ബ്രാഡ്ഷാ റോഡിലുള്ള ഗുരുദ്വാരയില്‍ അമേരിക്കന്‍ സമയം ഉച്ചയ്‌ക്ക് രണ്ടരയോടെയാണ് ആക്രമണമുണ്ടായത്. പരിക്കേറ്റ രണ്ട് പേരെയും ഉടന്‍ തന്നെ ആശുപത്രിയിലെത്തിച്ചു. ഇവര്‍ അപകടനില തരണം ചെയ്‌തെന്നാണ് വിവരം. അതേസമയം സംഭവവുമായി ബന്ധപ്പെട്ട് പോലീസ് രണ്ട് പേരെ കസ്റ്റഡിയിലെടുത്തിട്ടുണ്ട്. ഇവരുടെ പങ്കിനെക്കുറിച്ച്‌ അന്വേഷിച്ച്‌ വരികയാണ്. മുന്‍വൈരാഗ്യമാണ് ആക്രമണത്തിന് കാരണമെന്നാണ് പോലീസിന്റെ വിലയിരുത്തല്‍. പരിക്കേറ്റവര്‍ക്ക് അക്രമികളുമായി നേരത്തെ പരിചയമുണ്ടെന്ന് സാക്രമെന്റോ പോലീസ് പറയുന്നു. സംഭവത്തില്‍ അന്വേഷണം തുടരുകയാണ്.
