കുവൈത്ത് സിറ്റി: ഇന്ത്യയുമായുള്ള ഉഭയകക്ഷി ബന്ധങ്ങള്‍ ശക്തിപ്പെടുത്താനും വൈവിധ്യവത്കരിക്കാനും കുവൈത്തിന്റെ തീരുമാനം. ഇതുസംബന്ധിച്ച്‌ അഞ്ചാം റൗണ്ട് ഫോറിന്‍ ഓഫിസ് കൂടിയാലോചനകള്‍ ന്യൂഡല്‍ഹിയില്‍ നടന്നു.
ഉഭയകക്ഷി ബന്ധത്തിന്റെ വിവിധ വശങ്ങള്‍ ഇരുപക്ഷവും സമഗ്രമായി അവലോകനം ചെയ്തതായി കുവൈത്തിലെ ഇന്ത്യന്‍ എംബസി അറിയിച്ചു. കുവൈത്ത് ഏഷ്യ അഫയേഴ്സ് അസിസ്റ്റന്റ് വിദേശകാര്യ മന്ത്രി (എ.എഫ്.എം) അംബാസഡര്‍ സമീഹ് എസ്സ ജോഹര്‍ ഹയാത്ത്, കുവൈത്ത് പ്രതിനിധി സംഘത്തെ നയിച്ചു.
വിദേശകാര്യ മന്ത്രാലയം ജോയന്റ് സെക്രട്ടറി (ഗള്‍ഫ്) വിപുല്‍ ഇന്ത്യന്‍ പ്രതിനിധി സംഘത്തെ നയിച്ചു. ഇന്ത്യയിലെ കുവൈത്ത് അംബാസഡര്‍ ജസീം ഇബ്രാഹീം അല്‍ നജീം, കുവൈത്തിലെ ഇന്ത്യന്‍ അംബാസഡര്‍ ഡോ. ആദര്‍ശ് സ്വൈക എന്നിവരും മറ്റ് മന്ത്രാലയങ്ങളിലെ ഉദ്യോഗസ്ഥരും ചര്‍ച്ചയില്‍ പങ്കെടുത്തു.
