കുവൈത്ത് സിറ്റി: കുവൈത്ത് റെഡ് ക്രസന്‍റ് സൊസൈറ്റി (കെ.ആര്‍.സി.എസ്) ഗസ്സയില്‍ പുതപ്പുകളും ടെന്‍റുകളും അടങ്ങുന്ന ദുരിതാശ്വാസ സഹായങ്ങള്‍ വിതരണം ചെയ്തു.
ഈജിപ്തിലെ അല്‍ അരിഷില്‍നിന്ന് എത്തിയ പുതിയ ബാച്ച്‌ സഹായങ്ങളാണ് വിതരണം ചെയ്തത്.
ഗസ്സയിലെ കുവൈത്ത് ഹോസ്പിറ്റല്‍, റഫ നഗരത്തിലെ ഷെല്‍ട്ടറുകള്‍ എന്നിവിടങ്ങളില്‍ പുതപ്പുകളും ടെന്‍റുകളും വിതരണം ചെയ്തതായി സന്നദ്ധ സംഘടന തലവൻ അഹ്മദ് അബുദിയെ പറഞ്ഞു. മോശം കാലാവസ്ഥയും ഇസ്രായേല്‍ അധിനിവേശ ആക്രമണവും തുടരുന്ന ഈ സമയത്ത് സഹായം നിര്‍ണായകമാണെന്നും അബുദിയെ കൂട്ടിച്ചേര്‍ത്തു. ദുരിതാശ്വാസ സഹായത്തിന്‍റെ 90 ശതമാനവും ഗസ്സയില്‍ വിജയകരമായി എത്തിയതായി കെ.ആര്‍.സി.എസ് നേരത്തേ വ്യക്തമാക്കിയിരുന്നു. ഒക്‌ടോബര്‍ ഏഴിന് ഇസ്രായേല്‍ ആക്രമണം ആരംഭിച്ചതുമുതല്‍ ഗസ്സയിലേക്ക് കുവൈത്ത് മാനുഷിക എയര്‍ ബ്രിഡ്ജ് വഴി ദുരിതാശ്വാസ സഹായം അയക്കുന്നുണ്ട്. അതേസമയം, ഇസ്രായേല്‍ ആക്രമണം രൂക്ഷമാക്കിയത് സഹായവിതരണത്തിന് തടസ്സം സൃഷ്ടിക്കുന്നുണ്ട്.
