പെട്രോളിന്റെ വില ഒരു ലിറ്ററിന് 7 പെന്‍സ് ആണ് വര്‍ദ്ധിച്ചിരിക്കുന്നത്. ഇതോടെ ഒരു ഫുള്‍ ടാങ്ക് പെട്രോള്‍ അടിക്കുന്നതിനുള്ള ചിലവ് 4 പൗണ്ട് ഓളം കൂടി. ഡീസലിന്റെ വില വര്‍ധനവ് 8 പെന്‍സ് ആണ് . ഇതോടെ ഡീസല്‍ വാഹന ഉടമകള്‍ ഫുള്‍ ടാങ്ക് ഡീസല്‍ അടിക്കാന്‍ 4.41പൗണ്ട് കൂടുതല്‍ നല്‍കേണ്ടതായി വരും. പണപ്പെരുപ്പവും ജീവിത ചിലവ് വര്‍ധനവും മൂലം ബുദ്ധിമുട്ടിലായ ജനങ്ങള്‍ക്ക് ഇന്ധന വില വര്‍ധനവ് വലിയ ആഘാതമാവും. യുക്രൈന്‍ -റഷ്യ സംഘര്‍ഷം മൂലം ക്രൂഡ് ഓയില്‍ വില ഉയര്‍ന്നത് നേരത്തെ തന്നെ ഇന്ധന വിലവര്‍ധനവിന് കാരണമായിരുന്നു. ഈ വര്‍ഷമാദ്യം എണ്ണ ഉത്പാദനം കുറയ്ക്കാനുള്ള ഒപെകിന്റെ തീരുമാനം എണ്ണ വില ബാരലിന് 12 ഡോളര്‍ വര്‍ദ്ധിച്ച് 87 ഡോളറിലെത്താന്‍ കാരണമായിരുന്നു.
എണ്ണ വില കുതിച്ചതോടെ സകല മേഖലയിലും വിലക്കയറ്റം രൂക്ഷമാകും. ഇതിനെ പിടിക്കാന്‍ പലിശജനിരക്കു വീണ്ടും കൂട്ടിയാല്‍ അത് മോര്‍ട്ടഗേജ് വിപണിയെയും ജനങ്ങളെയും അതീവ ഗുരുതരമായി ബാധിക്കും.
വാഹന ഉപഭോക്താക്കള്‍ ഇന്ധനത്തിന്റെ ഉപയോഗം കുറയ്ക്കാന്‍ ശ്രമിക്കുകയാണ് മുന്നിലുള്ള ഏക പോംവഴി. ഇന്ധനത്തിന്റെ ഉപയോഗം പരമാവധി ലഘൂകരിക്കുന്നതിനുള്ള ഏറ്റവും കാര്യക്ഷമമായ വേഗത 45 -50 കിലോമീറ്റര്‍ ആണ്. ആവശ്യമല്ലെങ്കില്‍ കാറിന്റെ എയര്‍കണ്ടീഷനിങ് പ്രവര്‍ത്തിക്കാതിരിക്കുന്നത് ഇന്ധന ഉപയോഗം കുറയ്ക്കാനുള്ള ഒരു മാര്‍ഗ്ഗമാണ്. എ സി പ്രവര്‍ത്തിക്കുകയാണെങ്കില്‍ 10% വരെ ഇന്ധനത്തിന്റെ ഉപയോഗം വര്‍ദ്ധിക്കും. ടയറിന്റെ മര്‍ദ്ദം പതിവായി പരിശോധിക്കുന്നതും ശരിയായ രീതിയില്‍ ക്രമീകരിക്കുകയും ചെയ്യുന്നത് കൂടുതല്‍ ഇന്ധനക്ഷമത കൈവരിക്കുന്നതിന് സഹായിക്കും.
