മസ്കത്ത്: രാജ്യത്തെ വിവിധ ഗവര്ണറേറ്റുകളില് ശനിയാഴ്ച കനത്ത മഴക്കും കാറ്റിനും സാധ്യതയുണ്ടെന്ന് ഒമാൻ കാലാവസ്ഥ നിരീക്ഷണ കേന്ദ്രം അറിയിച്ചു.
തെക്കൻ-വടക്കൻ ശര്ഖിയ ഗവര്ണറേറ്റകളിലെ പര്വ്വതപ്രദേശങ്ങള്, മസ്കത്തിന്റെ ചില ഭാഗങ്ങള്, ദാഖിലിയ, തെക്കൻ ബാത്തിന, തീര പ്രദേശങ്ങള് എന്നിവിടങ്ങളിലായിരിക്കും മഴ പെയ്യുക. വിവിധ ഇടങ്ങളില് 14 മുതല് 30 മി.മീറ്റര് വരെ മഴ ലഭിച്ചേക്കും. വാദികള് നിറഞ്ഞൊഴുകും. പൊടി ഉയരുന്നതിനാല് ദൃശ്യപരതയെ ബാധിച്ചേക്കാനും സാധ്യതയുണ്ട്. മണിക്കൂറില് 64 മുതല് 120 കി.മീറ്റര് വരെ ആയിരിക്കും കാറ്റിന്റെ വേഗത.
താഴ്ന്ന സ്ഥലങ്ങളില്നിന്നും വാദികളില്നിന്നും മാറി നില്ക്കണമെന്ന് ഒമാൻ കാലാവസ്ഥ നിരീക്ഷണ കേന്ദ്രം അഭ്യര്ഥിച്ചു. വാദികകളില് നീന്താൻ ശ്രമിക്കരുതെന്നും കുട്ടികളെ നിരീക്ഷിക്കണമെന്നും വാദികള് മുറിച്ച് കടക്കാൻ അനുവദിക്കരുതെന്നും അധികൃതര് നിര്ദേശിച്ചു.