മസ്കറ്റ്: പുതുപ്പള്ളി ഉപതിരഞ്ഞെടുപ്പില്‍ ചാണ്ടി ഉമ്മന് മികച്ച ഭൂരിപക്ഷത്തോടെ വിജയിക്കാൻ കഴിയുമെന്ന് സേവ് ഒഐസിസി ഒമാൻ നാഷണല്‍ കമ്മിറ്റി.തിരഞ്ഞെടുപ്പിന്റെ അവസാന ഘട്ടത്തില്‍ പ്രവാസികളില്‍ ചിലര്‍ നേരിട്ട് മണ്ഡലത്തില്‍ എത്തി പ്രവര്‍ത്തനം നടത്തുമെന്നും കമ്മിറ്റി വ്യക്തമാക്കി.
പുതുപ്പള്ളി മണ്ഡലത്തിലെ എട്ട് പഞ്ചായത്തുകളുടെ ചാര്‍ജുകള്‍ കോട്ടയം ജില്ലയില്‍ നിന്നുമുള്ള നാഷണല്‍ കമ്മിറ്റി അംഗങ്ങള്‍ക്ക് നല്‍കി. അതാതു പഞ്ചായത്തിലെ ഒമാനില്‍ നിന്നുള്ള പ്രവാസികളുടെ വിവരങ്ങള്‍ ശേഖരിക്കുവാനും കഴിയുന്നവര്‍ക്ക് നാട്ടില്‍ പോകാനുള്ള അവസരം ഒരുക്കാനും ചാര്‍ജുള്ള അംഗങ്ങള്‍ക്ക് നിര്‍ദേശം നല്‍കി. അതോടൊപ്പം നാട്ടില്‍ പോകാൻ സാധിക്കാത്തവരുടെ കുടുംബത്തിലെ അംഗങ്ങളുടെ വോട്ടവകാശം ചാണ്ടി ഉമ്മന് അനുകൂലമായി വിനിയോഗിക്കാനും ശ്രമിക്കണം എന്നും യോഗം വിലയിരുത്തി.
പൊതു തിരഞ്ഞെടുപ്പിനേക്കാളുപരി സര്‍ക്കാരിന്റെ ഭരണ പരാജയത്തിന് ഷോക്ക് ട്രീറ്റ്മെന്റ് ആയി ഫലം മാറും എന്ന് യോഗത്തിനു അധ്യക്ഷത വഹിച്ചു കൊണ്ട് പ്രസിഡന്റ് അനീഷ് കടവില്‍ അഭിപ്രായപ്പെട്ടു. മണ്ഡലത്തിലെ പ്രവര്‍ത്തനങ്ങള്‍ക്കുവേണ്ടി തിരഞ്ഞെടുപ്പ് കമ്മിറ്റി കണ്‍വീനറായി ഷഹീര്‍ അഞ്ചല്‍, പഞ്ചായത്തുകളിലേക്കായി കോട്ടയം ജില്ലയില്‍ നിന്നുള്ള ജിജോ കടന്തോട്ട് – പുതുപ്പള്ളി / മണര്‍കാട്, പ്രിട്ടോ സാമുവല്‍ – പാമ്ബാടി / കൂരോപ്പട, ഹരിലാല്‍ വൈക്കം – വാകത്താനം അകലക്കുന്നം, മനോജ് ഇട്ടി – അയര്‍ക്കുന്നം / മീനടം തുടങ്ങിയവരെയും യഥാക്രമം തിരഞ്ഞെടുത്തു. യോഗത്തിന്റെ ഉദ്ഘാടനം ഉപദേശക സമിതി ചെയര്‍മാൻ ഹൈദ്രോസ് പതുവനയും നന്ദി പ്രകാശനം ട്രെഷറര്‍ സതീഷ് കണ്ണൂരും നിര്‍വഹിച്ചു.
