കുവൈത്ത് സിറ്റി: അവശ്യവസ്തുക്കളുടെ അന്യായമായ വിലവര്‍ധനക്കെതിരെ വ്യാപാര സ്ഥാപനങ്ങള്‍ക്കും വില്‍പന കേന്ദ്രങ്ങള്‍ക്കും വാണിജ്യ മന്ത്രാലയം മുന്നറിയിപ്പ്.
കൃത്രിമ വിലവര്‍ധന സൃഷ്ടിക്കുന്നവര്‍ക്കെതിരെ ശക്തമായ നടപടി സ്വീകരിക്കുമെന്ന് മന്ത്രാലയം അറിയിച്ചു. വിലക്കയറ്റം തടയാൻ എല്ലാ ഗവര്‍ണറേറ്റുകളിലും പരിശോധനകള്‍ കര്‍ശനമാക്കി. അവശ്യവസ്തുക്കള്‍ക്ക് അന്യായമായി വില വര്‍ധിക്കുന്നത് തടയുകയാണ് ലക്ഷ്യം.
നിത്യോപയോഗ സാധനങ്ങളുടെ വിലക്കയറ്റം തടയാന്‍ എല്ലാ നടപടികളും സ്വീകരിക്കും. വിവിധ ഉല്‍പന്നങ്ങളുടെ വിലകള്‍ ഉയര്‍ത്തി ഉപഭോക്താക്കളെ ചൂഷണം ചെയ്യുന്നത് വെച്ചുപൊറുപ്പിക്കില്ലെന്നും അധികൃതര്‍ വ്യക്തമാക്കി. എല്ലാ ഗവര്‍ണറേറ്റുകളിലും കാമ്ബയിനും ആരംഭിക്കും. നിയമലംഘനം കണ്ടെത്തുന്ന സ്ഥാപനങ്ങള്‍ അപ്പോള്‍ തന്നെ അടച്ചുപൂട്ടുമെന്നും വാണിജ്യ മന്ത്രാലയം മുന്നറിയിപ്പ് നല്‍കി. വിലക്കയറ്റത്തിനെതിരായ പരാതികള്‍ സര്‍ക്കാര്‍ ഏകീകൃത ആപ്ലിക്കേഷനായ സഹല്‍ ആപ് വഴിയോ ഗവര്‍ണറേറ്റുകളിലെ ഉപഭോക്തൃ സംരക്ഷണ കേന്ദ്രങ്ങള്‍ വഴിയോ സമര്‍പ്പിക്കാം. ഉപഭോക്താക്കള്‍ സമര്‍പ്പിക്കുന്ന ഏത് പരാതികളോടും ഉടനടി പ്രതികരിക്കാൻ ഫീല്‍ഡ് ടീമുകള്‍ തയാറാണെന്നും മന്ത്രാലയം ഉറപ്പുനല്‍കി.
