കോഴിക്കോട്: നൃത്തച്ചുവടുകള്‍ തെറ്റിച്ചതിന് 11കാരിയെ നൃത്താധ്യാപകൻ മര്‍ദ്ദിക്കുകയും മാനസികമായി പീഡിപ്പിക്കുകയും ചെയ്തെന്ന പരാതിയില്‍ മനുഷ്യാവകാശ കമ്മീഷൻ കേസെടുത്ത് പൊലീസ് അന്വേഷണത്തിന് ഉത്തരവിട്ടു.
കോഴിക്കോട് ടൗണ്‍ പൊലീസ് അസി. കമ്മീഷണര്‍ അന്വേഷണം നടത്തി 15 ദിവസത്തിനകം റിപ്പോര്‍ട്ട് സമര്‍പ്പിക്കണമെന്ന് കമ്മീഷൻ ആക്റ്റിങ് ചെയര്‍പേഴ്സണും ജുഡീഷ്യല്‍ അംഗവുമായ കെ. ബൈജൂനാഥ് ആവശ്യപ്പെട്ടു. നവംബര്‍ 28ന് കോഴിക്കോട് നടക്കുന്ന സിറ്റിംഗില്‍ കേസ് പരിഗണിക്കും.
എരഞ്ഞിക്കല്‍ സമര്‍പ്പണ ഫൈൻ ആര്‍ട്ട്സ് എന്ന നൃത്ത വിദ്യാലയത്തിനെതിരെയാണ് പരാതി. സിബിഎസ്‌ഇ കലോത്സവത്തോട് അനുബന്ധിച്ച്‌ ഒക്ടോബര്‍ 27 ന് നടന്ന പരിശീലനത്തിനിടയിലാണ് സംഭവം. തുടര്‍ന്ന് സ്ത്രീകളുടെയും കുട്ടികളുടെയും ആശുപത്രിയില്‍ കുട്ടി ചികിത്സ തേടി. മാതാപിതാക്കള്‍ എലത്തൂര്‍ പൊലീസ് സ്റ്റേഷനില്‍ പരാതി നല്‍കിയിരുന്നു.
