കുവൈത്ത് സിറ്റി: നാഫോ ഗ്ലോബല് 20ാം വാർഷികത്തോടനുബന്ധിച്ച് 20 സാമൂഹിക ക്ഷേമ പദ്ധതികള് നടപ്പിലാക്കുന്നു. 35 ലക്ഷം രൂപ ചെലവഴിച്ചാണ് 135ല്പരം ഗുണഭോക്താക്കള്ക്ക് പദ്ധതിയുടെ സഹായം ലഭ്യമാക്കുന്നത്.
പ്ലസ് വണ് മുതല് ബിരുദാനന്ത ബിരുദം വരെയുള്ള വിദ്യാർഥികള്ക്കുള്ള ധനസഹായം, പ്രൈമറി മിഡില് സ്കൂള് വിദ്യാർഥികള്ക്ക് പഠന കിറ്റ്, സ്മാർട്ട് ഫോണ്, സ്പെഷലൈസ്ഡ് വിദ്യാലയങ്ങള്ക്ക് ഇന്ററാക്ടിവ് സ്മാർട്ട് ബോർഡ്, ഉച്ചഭക്ഷണ പദ്ധതികള്ക്കുള്ള യന്ത്രോപകരണങ്ങള് തുടങ്ങിയവ വിദ്യാഭ്യാസ മേഖലയില് നടപ്പിലാക്കും. ബധിര വിദ്യാർഥികള്ക്ക് ശ്രവണ സഹായ ഉപകരണം, മുച്ചുണ്ട് ശസ്ത്രക്രിയക്കുള്ള ധന സഹായം, യന്ത്രവത്കൃത വീല്ചെയർ, ഹരിതകർമസേനക്ക് സാനിറ്ററി കിറ്റ്, അപകടങ്ങളില്പ്പെട്ട് കിടപ്പു രോഗികളായ യുവജനങ്ങള്ക്കുള്ള സഹായം, ഡയാലിസിസ് സഹായം, അർബുദ ചികിത്സ സഹായം എന്നിവ ആരോഗ്യ രംഗത്ത് നടപ്പില് വരുത്തും.
വയോധികർക്ക് തിമിര ശസ്ത്രക്രിയ, സ്ത്രീകള്ക്ക് പ്രതിമാസ പെൻഷൻ, ശരണാലയങ്ങളിലെ അന്തേവാസികള്ക്ക് വസ്ത്രം, മരുന്ന്, പോഷകാഹാരം എന്നിവ വയോജന ക്ഷേമത്തിനായി നടപ്പാക്കും. അഗതി മന്ദിരങ്ങളിലെ യുവതികള്ക്ക് വിവാഹ ധനസഹായം, ദരിദ്ര കുടുംബങ്ങള്ക്കുള്ള പാർപ്പിട നിർമാണം, സർക്കാർ എയ്ഡഡ് സ്കൂളുകളില് ജ്യോതി ശാസ്ത്ര പരീക്ഷണ ലബോറട്ടറികള്, പഠനത്തില് സമർഥരായ അനാഥ കുട്ടികളെ ഏറ്റെടുത്ത് സംരക്ഷിക്കുക എന്നീ പ്രത്യേക ക്ഷേമ സുരക്ഷ പദ്ധതികളും ഇരുപതിന പദ്ധതികളുടെ ഭാഗമാണ്. നാഫോ സ്നേഹസ്പർശം അധ്യക്ഷൻ വിജയകുമാർ മേനോൻ പദ്ധതി പ്രഖ്യാപിച്ചു. നാഫോ ഗ്ലോബല് സെക്രട്ടറി എം.എസ്. നായർ, വിജയൻ നായർ എന്നിവർ പങ്കെടുത്തു. www.nafoglobal.com വഴി അപേക്ഷ സമർപ്പിക്കാം.