അമേരിക്കന്‍ വ്യോമസേനയില്‍ മേജറായി കൊല്ലംകാരനായ ഡോ.അനീഷ് ജോര്‍ജ്. ടെക്സസില്‍ വിരമിച്ച പട്ടാളക്കാര്‍ക്കായുള്ള വെറ്ററന്‍സ് ഹോസ്പിറ്റലില്‍ ജോലി ചെയ്യുമ്ബോഴാണ് ഡോ.അനീഷ് അഭിമാനകരമായ നേട്ടം സ്വന്തമാക്കിയത്.
യുദ്ധമേഖലകളില്‍ ജോലി ചെയ്യേണ്ടിവരും. അടിയന്തര സാഹചര്യങ്ങളില്‍ വ്യോമസേന നിയോഗിക്കുന്നയിടങ്ങളിലേക്ക് പോകണം. കൊല്ലം ശക്തികുളങ്ങര സ്വദേശിയായ ഡോ.അനീഷ് ജോര്‍ജ് അമേരിക്കന്‍ വ്യോമസേനയുടെ ഭാഗമായത് ഈ വെല്ലുവിളികളൊക്കെ നേരിടാനുറച്ചാണ്. ഏറെക്കാലം കണ്ട സ്വപ്നമാണ് യാഥാര്‍ഥ്യമായതെന്ന് ഡോക്ടര്‍ പറയും.
കോഴിക്കോട് മെഡിക്കല്‍ കോളജില്‍ നിന്ന് എംബിബിഎസ് പൂര്‍ത്തിയാക്കി 2008ലാണ് അമേരിക്കയില്‍ സ്ഥിരതാമസമാക്കുന്നത്. തിരക്കുകളൊക്കെ കഴിഞ്ഞ് ഭാര്യ ജീനുവിനും മക്കള്‍ക്കുമൊപ്പം നാട്ടിലേക്ക് വരാന്‍ കാത്തിരിക്കുകയാണ് ഡോ.അനീഷ്.
